ஶ்ரீவில்லிபுத்தூர் அருகே நாய்களை வைத்து மான் வேட்டை: 4 பேர் கைது

ஸ்ரீவில்லிபுத்தூர்: திருவண்ணாமலை பகுதியில் வேட்டை நாய்கள் வைத்து மான் வேட்டையாடிய 4 பேரை வனத்துறையினர் கைது செய்தனர்.

ஸ்ரீவில்லிபுத்தூர் அருகே திருவண்ணாமலை பகுதியில் விவசாய நிலத்துக்குள் வரும் மான்களை வேட்டை நாய்கள் வைத்து மர்ம நபர்கள் சிலர் வேட்டையாடுவதாக வனத்துறைக்கு ரகசியத் தகவல் கிடைத்தது. ஸ்ரீவில்லிபுத்தூர் - மேகமலை புலிகள் காப்பக துணை இயக்குநர் தேவராஜ் உத்தரவின்பேரில், ஸ்ரீவில்லிபுத்தூர் வனச்சரகர் செல்லமணி தலைமையி லான வனத்துறையினர் மலையடிவாரப் பகுதிகளில் ரோந்து பணியில் ஈடுபட்டனர்.

நேற்று காலை ரெங்கர் கோயில் பீட்டுக்கு உட்பட்ட தோட்டத்தில் மான் வேட்டையில் ஈடுபட்ட பெருமாள்பட்டியைச் சேர்ந்த தங்கராஜ் (30), முத்து கிருஷ்ணன் (38) ஆகிய இருவரை கைது செய்தனர். அவர்கள் அளித்த தகவலின் பேரில் திருவண்ணாமலையைச் சேர்ந்த சந்திரகுமார் (26), நாகராஜ் (34) ஆகிய இருவரையும் கைது செய்தனர்.

இதுகுறித்து வனத்துறையினர் கூறியதாவது: ஸ்ரீவில்லிபுத்தூர் வனச்சரகம் ரெங்கர் கோயில் பீட்டில் வனப்பகுதிக்கு வெளியே பட்டா நிலத்தில் வைத்து நாய்கள் மூலம் மானை வேட்டையாடி உள்ளனர். அவர்கள் வேட்டையாடிய மானுக்கு 3 முதல் 4 வயது இருக்கும். வன விலங்குகளை வேட்டையாடுபவர்கள் மீது கடும் நடவடிக்கை எடுக்கப்படும் என்றனர்.