தங்கையை ஆணவக்கொலை செய்த அண்ணன்; மாற்று சமூக இளைஞரை காதலித்ததால் கொடூரம்; பல்லடம் அதிர்ச்சி

திருப்பூர்: பல்லடம் அருகே பருவாய் கிராமத்தை சேர்ந்தவர் தண்டபாணி. கூலித் தொழிலாளி. இவரது மகள் வித்யா (22). கோவை அரசுக் கல்லூரியில் 3-ம் ஆண்டு படித்து வந்தார். திருப்பூரை சேர்ந்த வெண்மணி என்ற இளைஞருடன், வித்யா பழகி வந்ததாக கூறப்படுகிறது.

கடந்த 30-ம் தேதி வீட்டில் இருந்தவர்கள் வெளியே சென்றிருந்ததாக கூறப்படுகிறது. பின்னர் அவர்கள் வீடு திரும்பியபோது, வீட்டுக்குள் வித்யா ரத்த வெள்ளத்தில் சடலமாக கிடந்தார். இதையடுத்து, பீரோ விழுந்து உயிரிழந்ததாக கூறி அவரது சடலத்தை குடும்பத்தினர் மற்றும் உறவினர்கள் அடக்கம் செய்தனர். வித்யாவின் மரணத்தில் சந்தேகம் இருப்பதாக கிராம நிர்வாக அலுவலர் பூங்கொடியிடம் திருப்பூரை சேர்ந்த இளைஞர் புகார் அளித்தார்.

இதையடுத்து வட்டாட்சியர் சபரிகிரி முன்னிலையில் சடலத்தை தோண்டி எடுத்து, மருத்துவர் குழு முன்னிலையில் பிரேத பரிசோதனை நடைபெற்றது. உடற்கூராய்வு முடிந்த நிலையில் தந்தை தண்டபாணி, சகோதரர் சரவணன் ஆகியோரை காமநாயக்கன்பாளையம் போலீஸார் விசாரணைக்கு அழைத்துச் சென்றனர். அவர்களிடம் போலீஸார் விசாரித்தனர். இதில் மாற்று சமூக இளைஞரை காதலித்ததால் தங்கையை இரும்பு கம்பியால் அடித்துக்கொன்றதாக அப்பெண்ணின் அண்ணன் வாக்குமூலம் அளித்துள்ளார்