சென்னை | ​போலி பாஸ்​போர்ட்கள் தயாரித்த ஏஜென்ட்கள் 6 பேர் கைது: கணினிகள், செல்போன்கள் பறிமுதல்

சென்னை: போலி பாஸ்​போர்ட்கள் தயாரித்த ஏஜென்ட்கள் 6 பேரை போலீ​ஸார் கைது செய்​தனர். சென்னை விமான நிலைய குடி​யுரிமை அதிகாரி​கள், சென்னை காவல் ஆணையர் அலுவலகத்​தில் சமீபத்​தில் புகார் ஒன்றை அளித்​தனர். அதில், ‘இந்திய பயணிகள் சிலர் போலி ஆவணங்களை சமர்ப்​பித்து, போலி இந்திய பாஸ்​போர்ட்களை பெற்று, அதன்​மூலம் வெளி​நாடு​களுக்கு செல்ல முயற்சிக்​கின்​றனர். எனவே, சம்பந்​தப்​பட்ட பயணி​கள், அவர்​களுக்கு உதவிய ஏஜென்ட்கள் மீது நடவடிக்கை எடுக்க வேண்​டும்’ என குறிப்​பிட்​டிருந்​தனர்.

இதுகுறித்து போலி கடவுச்​சீட்டு புலனாய்வு பிரிவு போலீ​ஸார் வழக்கு பதிவு செய்து விசாரணை நடத்​தினர். விசா​ரணை​யில் கிடைத்த தகவல்கள் அடிப்​படை​யில், மதுரை மாவட்டம் பரசுராமன்​பட்டி, சமயநல்​லூர், சிவகங்கை மாவட்டம் தேவகோட்டை, ஒத்தக்கடை ஆகிய பகுதி​களில் டிராவல்ஸ் நடத்தி வரும் ஏஜென்ட்​களான சதீஷ்கு​மார் (46), கல்யாண் (40), நல்லா​முகமது (60), நாசர் அலி (47), பவுசல் ரஹ்மான் (29), குமார் (48) ஆகிய 6 பேரை போலீ​ஸார் கைது செய்து விசாரித்தனர்.

இவர்​களது நிறு​வனங்கள் மூலமாக வெளி​நாடு​களுக்கு வேலைக்கு சென்று, ‘பிளாக் லிஸ்ட்​டில்’ இந்தியா​வுக்கு திருப்பி அனுப்​பப்​பட்ட நபர்களை, மீண்​டும் வெளி​நாடு​களுக்கு அனுப்பு​வதற்​காக, அவர்​களிடம் போலி ஆவணங்களை பெற்று, அதன்​மூலம் போலி பாஸ்​போர்ட்களை தயாரித்து, விசா ஏற்பாடு செய்து கொடுத்து வெளி​நாடு​களுக்கு அனுப்பி வந்தது தெரிய​வந்​தது.

கைது செய்​யப்​பட்ட 6 பேரிடம் இருந்து, கணினிகள், லேப் டாப், செல்​போன்​கள், 54 போலி பாஸ்​போர்ட்கள் உள்ளிட்​ட​வற்றை போலீ​ஸார் பறிமுதல் செய்​தனர். பின்னர், அவர்களை நீதி​மன்​றத்​தில் ஆஜர்​படுத்தி, சிறை​யில் அடைத்​தனர். போலி பாஸ்​போர்ட் பெற ​விண்​ணப்​பித்​தவர்​களை​யும் கைது செய்ய நடவடிக்கை மேற்கொண்டுள்ளதாக போலீஸார் தெரிவித்தனர்.