-
-
-
Loading
அமராவதி: விசாகப்பட்டினத்தில் 20 வயது சட்டக்கல்லூரி மாணவி, அவரது காதலன் மற்றும் அவரது நண்பர்கள் மூவரால் கூட்டுப் பாலியல் வன்கொடுமை செய்யப்பட்ட சம்பவம் அதிர்ச்சியை உருவாக்கியுள்ளது. இந்த கொடூரத்தை வீடியோ எடுத்த அவர்கள், அப்பெண்ணை பல மாதங்களாக மிரட்டி வந்தனர்.
விசாகப்பட்டினத்தை சேர்ந்த 20 வயதான சட்டக்கல்லூரி மாணவிக்கும், அவரது காதலனுக்கும் ஒரு வருடத்திற்கும் மேலாக தொடர்பு இருந்து வந்துள்ளது. திருமணம் செய்து கொள்வதாக உறுதியளித்து அவரது காதலன் பழகியுள்ளார். இந்த நிலையில் ஆகஸ்ட் 13 அன்று, அவர் அந்தப் பெண்ணை தனது நண்பரின் அறைக்கு அழைத்துச் சென்று பாலியல் வன்கொடுமை செய்துள்ளார். அவரது நண்பர்கள் 3 பேர் இந்த செயலை படம் பிடித்தனர். அவர்கள் அந்த காட்சிகளை பரப்புவதாக மிரட்டி, அப்பெண்ணை பல முறை பாலியல் வன்கொடுமை செய்துள்ளனர்.
இந்த கொடுமை பல மாதங்களாக தொடர்ந்தது. இந்த கொடுமை தாங்காமல் கடந்த திங்கள்கிழமை அந்த பெண் தற்கொலைக்கு முயன்றார். ஆனால் அவரது தந்தை சரியான நேரத்தில் அப்பெண்ணை காப்பாற்றியுள்ளார். அப்போது தனக்கு நடந்த கொடூரம் பற்றி குடும்பத்தினரிடம் கூறியுள்ளார். இதையடுத்து அவரது குடும்பத்தினர் ஆதரவுடன் அந்தப் பெண் போலீஸில் புகாரளித்தார்.
கூட்டுப்பாலியல் வன்கொடுமை, கிரிமினல் மிரட்டல், தகவல் தொழில்நுட்பச் சட்டத்தின் பிரிவுகள் ஆகியவற்றுடன் தொடர்புடைய பாரதிய நியாய சன்ஹிதா பிரிவுகளின் கீழ் குற்றம் சாட்டப்பட்ட நான்கு பேரும் கைது செய்யப்பட்டுள்ளதாக விசாகப்பட்டினம் நகர போலீஸார் தெரிவித்தனர். விசாகப்பட்டினம் போலீஸ் கமிஷனர் ஷங்க பிரதா பாக்சி கூறுகையில், "பாதிக்கப்பட்ட பெண்ணின் காதலன் மற்றும் அவரது நெருங்கிய நண்பர்கள் மூன்று பேரும் கைது செய்யப்பட்டு ரிமாண்ட் செய்யப்பட்டனர்" என்றார்.
இந்த சம்பவம் தொடர்பாக எதிர்க்கட்சியான ஒய்எஸ்ஆர் காங்கிரஸ் கட்சி சந்திரபாபு நாயுடு தலைமையிலான தெலுங்கு தேசம் கட்சி அரசை கடுமையாக சாடியுள்ளது. "விசாகப்பட்டினத்தில் சட்டக்கல்லூரி மாணவி நான்கு இளைஞர்களால் கூட்டு பலாத்காரம் செய்யப்பட்டார். அந்த கொடூரத்தை செல்போனில் படம்பிடித்து பலமுறை மிரட்டல் விடுத்துள்ளனர். இந்தக் கூட்டணி அரசின் கையாலாகாத்தனத்தால் இன்னும் எத்தனை பெண்கள் பலியாக வேண்டும்” என்று முதல்வர், துணை முதல்வர் பவன் கல்யாண் மற்றும் ஆந்திர உள்துறை அமைச்சர் வாங்கலபுடி அனிதாவை டேக் செய்து அக்கட்சி விமர்சித்துள்ளது.
