இலங்கைக்கு கடத்தப்பட்ட 1,263 கிலோ பீடி இலைகள், 118 கிலோ சுருட்டு பறிமுதல் - இருவர் கைது

ராமேசுவரம்: தமிழக கடலோரப் பகுதிகளில் இருந்து கடத்தப்பட்ட 1,263 கிலோ பீடி இலைகள், 118 கிலோ சுருட்டை பறிமுதல் செய்த இலங்கை கடற்படையினர், 2 பேரை கைது செய்தனர்.

ஞாயிற்றுக்கிழமை மாலை இலங்கையில் உள்ள புத்தளம் மாவட்டம் இப்பன் தீவு கடற்பகுதியில் அந்நாட்டு கடற்படையினர் ரோந்துப் பணியின் போது, சந்தேகப்படும்படியான ஒரு பைபர் படகுகளில் சோதனை மேற்கொண்டனர். சோதனையின் போது 37 பண்டல்களில் சுமார் 1,263 கிலோ பீடி இலை, 118 கிலோ சுருட்டு ஆகியவற்றை பறிமுதல் செய்தனர். தொடர்ந்து படகில் இருந்து கல்பிட்டி பகுதியைச் சேர்ந்த இரண்டு நபர்களை இலங்கை கடற்படையினர் கைது செய்தனர்.

முதற்கட்ட விசாரணையில் பீடி இலை, சுருட்டு தமிழகத்தின் கடற்பகுதியில் இருந்து கடத்தி வரப்பட்டது என தெரியவந்துள்ளது. இந்த கடத்தலில் தொடர்புடையவர்கள் குறித்து இலங்கை கடற்படையினர் தொடர்ந்து விசாரணை நடத்தி வருகின்றனர்.