புதுச்சேரியில் சிறுமிக்கு பாலியல் வன்கொடுமை: 4 பேர் கைது

புதுச்சேரி: மகாராஷ்டிர மாநிலம் மும்பையைச் சேர்ந்த 16 வயது சிறுமி புதுச்சேரியில் தனது உறவினர் வீட்டுக்கு வந்துள்ளார். அவர் கடந்த அக்.30ம் தேதி திடீரென மாயமானதாகக் கூறப்படுகிறது. இது குறித்து அவரது உறவினர் பெரிகடை காவல் நிலையத்தில் புகார் அளித்தார்.

போலீஸார் வழக்குப் பதிவு செய்து சிறுமியை தேடி வந்தனர். மேலும், அப்பகுதியில் பொருத்தப்பட்டுள்ள சிசிடிவி காட்சிகளை ஆய்வு செய்து விசாரித்து வந்தனர். அப்போது மாயமான சிறுமி ஆட்டோவில் ஏறிச் செல்வதை கண்டுபிடித்தனர். அந்த ஆட்டோ டிரைவர் குறித்து விசாரித்தபோது, அவர் புதுச்சேரி அடுத்த தமிழக பகுதியான கோட்டாகுப்பத்தை சேர்ந்த கஜா முகைதீன் (30) என்பதும், அவர் ஆட்டோவில் சிறுமியை அழைத்துச் சென்று பாலியல் வன்கொடுமை செய்ததும், பின்னர் அப்பகுதியில் உள்ள கடற்கரை விடுதி அருகே சிறுமியை விட்டுச் சென்றதும் தெரியவந்துள்ளது.

இதையடுத்து ஆட்டோ ஓட்டுநர், காஜா முகைதீனை போலீஸார் கைது செய்தனர். சிறுமியை புதுச்சேரி கடற்கரைப் பகுதியில் கடந்த 2ம் தேதி போலீஸார் மீட்டனர். அவரிடம் நடைபெற்ற விசாரணையில் புதுச்சேரி பகுதியிலிருந்து சென்னைக்கு 4 பேர் அவரை அழைத்துச் சென்று பாலியல் வன்கொடுமை செய்து, வாடகை வாகனத்தில் புதுச்சேரிக்கு அனுப்பிவைத்திருப்பதும் தெரியவந்தது.

இதையடுத்து சென்னையைச் சேர்ந்த 3 பேரை போலீஸார் இன்று கைது செய்தனர். மேலும் ஒருவரைத் தேடி வருவதாகவும், முழுமையான விசாரணைக்கு பிறகே உண்மை நிலவரம் தெரியவரும் என்று போலீஸார் தரப்பில் தெரிவித்தனர்.