லைசென்ஸ் புதுப்பிக்க 3,000 கொடு! மின்வாரிய கண்காணிப்பாளர் கையும் களவுமாக கைது

லைசென்ஸை புதுப்பிக்க 3 ஆயிரம் லஞ்சம் வாங்கிய மின்வாரிய கண்காணிப்பாளர் கையும் களவுமாக கைது செய்தது லஞ்ச ஒழிப்புத்துறை.

சென்னை செங்குன்றத்தை சேர்ந்தவர் கிருஷ்ணகுமார். மின்வாரிய ஒப்பந்ததாரரான இவர் தனது செம்புகுட்டி அசோசியேசன் என்ற மின் நிறுவனத்தின் ஏ கிரேட் லைசென்ஸை புதுப்பிப்பதற்காக கிண்டியில் உள்ள மின்வாரிய ஒப்பந்தத்தாரர்களுக்கான லைசென்ஸ் வழங்கும் பிரிவு அலுவலகத்தில் கடந்த மே 5 தேதி விண்ணப்பத்திருந்தார். மூன்று மாதங்களுக்கு பிறகு கிருஷ்ணகுமார் கடந்த 10ம் தேதி கிண்டி மின்வாரிய அலுவலகத்திற்கு சென்று தனது லைசென்ஸ் புதுப்பிப்பது தொடர்பாக ஊழியர்களிடம் கேட்டப்போது லைசென்ஸ் ரெடியாகி விட்டது, கண்காணிப்பாளர் ஸ்ரீதரிடம் சென்ற வாங்கி கொள்ளுமாறு தெரிவித்துள்ளனர்.

பின்னர் கண்காணிப்பாளர் ஸ்ரீதரிடம் சென்று கேட்டதற்கு பத்தாயிரம் ரூபாய் லஞ்சம் கொடுத்துவிட்டு வாங்கிக் செல்லுமாறு தெரிவித்துள்ளார். கிருஷ்ணகுமார் மீண்டும் 14ம் தேதி சென்ற என்னால் பத்தாயிரம் ரூபாய் லஞ்சம் தர இயலாது என கண்காணிப்பாளர் ஸ்ரீதரிடம் கூறியதற்கு அவர் 16 அல்லது 17ம் தேதி வந்து 3,000 ரூபாய் கொடுத்துவிட்டு லைசென்ஸை பெற்றுச் செல்லுங்கள் என கறாராக கூறியுள்ளார். இதனால் மன உளைச்சலுக்கு ஆளான கிருஷ்ணகுமார் இது குறித்து லஞ்ச ஒழிப்புத்துறை போலீஸில் புகார் அளித்தார். பின்னர் லஞ்ச ஒழிப்புத்துறை ஆலோசனை படி ரசாயன பவுடர் தடவிய 3,000 ரூபாய் நோட்டுக்களுடன் இன்று மாலை கிருஷ்ணகுமார் கிண்டி அலுவலகத்திற்கு சென்று அங்கிருந்த கண்காணிப்பாளர் ஸ்ரீதரிடம் கொடுத்துள்ளார். அப்போது அங்கு மறைந்திருந்த லஞ்ச ஒழிப்புத்துறை போலீஸார் கண்காணிப்பாளர் ஸ்ரீதரை கையும் களவுமாக கைது செய்து விசாரணை நடத்தி வருகின்றனர்.