அதிகாலையில் கொடூரம்... உறங்கிக் கொண்டிருந்த மனைவி, மகளை வெட்டிக் கொன்ற வாலிபர்!

அதிகாலையில் உறங்கிக் கொண்டிருந்த மனைவி, மற்றும் 8 மாத கைக்குழந்தையை கோடாரியால் வாலிபர் வெட்டிக் கொலை செய்த சம்பவம் உத்தரப்பிரதேசத்தில் பெரும் பரபரப்பு ஏற்பட்டுள்ளது.

உத்தரப்பிரதேச மாநிலம், படவுன் மாவட்டத்தைச் சேர்ந்தவர் அகிலேஷ் யாதவ் என்ற அஜய் யாதவ்(25). இவருக்கும் பீகாரைச் சேர்ந்த குஷ்பு(19) என்பவருக்கும் திருமணம் நடைபெற்றது. இவர்களுக்கு ஸ்ருஷ்டி என்ற 8 மாத பெண் குழந்தை இருந்தது. இவர்கள் பூடேலி கிராமத்தில் வசித்து வந்தனர்.

இந்நிலையில் இன்று அதிகாலை வீட்டில் உறங்கிக் கொண்டிருந்த தனது மனைவி குஷ்புவையும், மகள் ஸ்ருஷ்டியையும் கோடாரியால் அஜய் சரமாரியாக வெட்டினார். இதில் அவர்கள் இருவரும் சம்பவ இடத்திலேயே ரத்த வெள்ளத்தில் உயிரிழந்தனர்.

இந்த இரட்டைக்கொலை தொடர்பாக தகவல் அறிந்த போலீஸார், விரைந்து வந்து கொலை செய்யப்பட்ட இருவரின் உடல்களையும் கைப்பற்றி பிரேத பரிசோதனைக்காக மருத்துவமனைக்கு அனுப்பி வைத்தனர். மேலும் வழக்குப்பதிவு செய்து விசாரணை நடத்தினர்.

அப்போது. கடந்த சில நாட்களாக கணவன், மனைவிக்குள் தகராறு இருந்துள்ளது. இதனால் தன் தாய் வீட்டிற்குச் செல்ல வேண்டும் என்று குஷ்பு தொடர்ந்து வலியுறுத்தி வந்துள்ளார்.

இந்நிலையில், நேற்று இரவு மீண்டும் கணவன், மனைவிக்குள் தகராறு ஏற்பட்டுள்ளது. இதனால் இரவு பண்ணைக்கு அஜய் சென்று விட்டார். இன்று அதிகாலை அவர் வீட்டிற்கு வந்த போது மனைவியும், மகளும் உறங்கிக் கொண்டிருந்துள்ளனர். அவர்கள் இருவரையும் கோடாரியால் வெட்டிக்கொலை செய்து விட்டு அஜய் தப்பிச் சென்றது தெரிய வந்தது. அவரை போலீஸார் வலைவீசி தேடி வருகின்றனர்.

குடும்பத் தகராறில் மனைவி, மகளை வாலிபர் வெட்டிக்கொலை செய்த சம்பவம் உத்தரப்பிரதேசத்தில் பரபரப்பை ஏற்படுத்தியுள்ளது.