பிரபல ரவுடி படப்பை குணா சைதாப்பேட்டை நீதிமன்றத்தில் சரண்

காஞ்சிபுரம் மாவட்டம் மதுரமங்கலம் பகுதியைச் சேர்ந்த குணசேகரன் என்கிற படப்பை குணா பிரபல ரவுடி ஆவார். இவர் திருவள்ளூர், காஞ்சிபுரம் ,செங்கல்பட்டு ஆகிய மாவட்டங்களில் கொலை, கொலை முயற்சி, கட்டப்பஞ்சாயத்து, அடிதடி, தொழிற்சாலை அதிபர்களை மிரட்டி பணம் பறிப்பது, ஆள்கடத்தல் பல சமூக விரோதச் செயல்களில் ஈடுபட்டு வந்துள்ளார்.

இவர் மீது காஞ்சிபுரம் மாவட்டத்தில் 29 வழக்குகள், செங்கல்பட்டு, திருவள்ளூர் மாவட்டங்களில் 19 வழக்குகள் உட்பட மொத்தம் 48 வழக்குகள் உள்ளன. அதில் 8 கொலை வழக்குகளும், 9 கொலை முயற்சி வழக்குகளும் அடங்கும்.

இந்நிலையில் காவல் துறையால் தேடப்பட்டுவந்த குணா தொடர்ந்து தலைமறைவாக இருந்துகொண்டு, பல குற்றச்செயல்களில் தொடர்ந்து ஈடுபட்டுவருவதாகப் புகார்களும் எழுந்தவண்ணம் இருந்தன. இதையடுத்து குணாவைப் பிடிக்க என்கவுன்டர் ஸ்பெஷலிஸ்டான டிஎஸ்பி வெள்ளதுரை தலைமையில் தனிப்படை அமைக்கப்பட்டது.

இதற்கிடையே குணாவின் மனைவி எல்லம்மாள் உயர் நீதிமன்றத்தில் வழக்கு ஒன்றைத் தொடர்ந்தார். அதில் உள்ளாட்சி தேர்தலில் சுயேச்சையாகப் போட்டியிட்டு வெற்றி பெற்றது முதல், ஆளுங்கட்சியைச் சேர்ந்தவர்கள் தொடர்ந்து தங்களுக்கு மிரட்டல் விடுத்துவருவதாகவும், தனது கணவர் குணா சரணடைய தயாராக உள்ள நிலையில் காவல் துறையினர் அவரை என்கவுன்ட்டர் செய்யத் திட்டமிட்டிருப்பதாகவும் குறிப்பிட்டிருந்தார்.

இந்த வழக்கு விசாரணைக்கு வந்தபோது காவல் துறை தரப்பில் ஆஜரான வழக்கறிஞர், குணாவை என்கவுன்ட்டர் செய்யும் திட்டமில்லை என நீதிமன்றத்தில் தெரிவித்தார். இதனையடுத்து குணா சரணடையும்பட்சத்தில் காவல் துறை விதிகளுக்குட்பட்டு நடத்தப்படுவார் என கூறி வழக்கை நீதிமன்றம் முடித்து வைத்தது.

இந்நிலையில் போலீஸாரால் தேடப்பட்டு வந்த குணா இன்று காலை சைதாப்பேட்டை நீதிமன்றத்தில் சரணடைந்தார். அவரை வரும் 31-ம் தேதி வரை நீதிமன்றக் காவலில் சிறையில் அடைக்க 17-வது குற்றவியல் நீதிமன்ற நடுவர் கிருஷ்ணன் உத்தரவிட்டார். இதனை தொடர்ந்து பலத்த போலீஸ் பாதுகாப்புடன் நீதிமன்றத்தில் இருந்து பூந்தமல்லி கிளை சிறைக்கு அவர் அழைத்துச் செல்லப்பட்டார்.

அடுத்த கட்ட நடவடிக்கையாக, குணாவை போலீஸ் காவலில் எடுத்து விசாரிக்க காவல் துறை திட்டமிட்டுள்ளது. ஒரிரு நாட்களில் அதற்கான மனுவை நீதிமன்றத்தில் தாக்கல் செய்ய உள்ளதாகக் காவல் துறை வட்டாரங்கள் தெரிவிக்கின்றன.