ஆனைமலை மாசாணியம்மன் கோயிலில் நடிகர் சூர்யா சாமி தரிசனம்!

பொள்ளாச்சி: இயக்குநர் சிறுத்தை சிவா இயக்க நடிகர் சூர்யா நடித்துள்ள "கங்குவா" திரைப்படம் கடந்த சில நாட்களுக்கு முன்பு திரைக்கு வந்து கலவையான விமர்சனங்களுடன் ஓடிக்கொண்டிருக்கிறது. இதனைத் தொடர்ந்து நடிகர் சூர்யாவின் 45 வது படம் தொடர்பான அறிவிப்பு சில வாரங்களுக்கு முன்பு வெளியானது.

சூர்யாவின் 45-வது திரைப்படத்தை, நடிகரும் இயக்குநருமான ஆர்.ஜே.பாலாஜி இயக்க உள்ளார். இந்த படத்தை ட்ரீம் வாரியர் பிக்சர்ஸ் நிறுவனம் தயாரிக்க உள்ளது. படத்துக்கு ஏ.ஆர்.ரகுமான் இசையமைக்கிறார். ஆர்.ஜே.வாக இருந்து ‘தீயா வேலை செய்யணும் குமாரு’ படத்தின் மூலம் நடிகராக அறிமுகமான ஆர்.ஜே.பாலாஜி, ’மூக்குத்தி அம்மன்’, ‘வீட்ல விசேஷம்’ ஆகிய படங்களை இயக்கியுள்ளார். கடந்த சில வாரங்களுக்கு முன்பு ‘சூர்யா 45’ பட அறிவிப்பு தொடர்பான முதல் போஸ்டரும் வெளியாகியது.

இந்நிலையில் ‘சூர்யா 45’ படப்பிடிப்பு இன்று கோவை மாவட்டம் பொள்ளாச்சி அருகே ஆனைமலையில் உள்ள பிரசித்தி பெற்ற மாசாணி அம்மன் கோயிலில் பூஜையுடன் தொடங்கியது. இதில், நடிகர் சூர்யா, இயக்குநர் ஆர்.ஜே.பாலாஜி, படத்தின் தயாரிப்பாளர் மற்றும் ஆர்.ஜே.பாலாஜியின் குடும்பத்தினர் உள்ளிட்டோர் பங்கேற்றனர். மாசாணியம்மன் கோயிலில் சூர்யா மனமுருகி வழிபட்டார். முதற்கட்ட படிப்பிடிப்பை 35 நாட்கள் கோவையில் நடத்த படக்குழு திட்டமிட்டுள்ளது.