நடிகர் அஜித்துக்கு துணை முதல்வர் உதயநிதி வாழ்த்து!

கார் பந்தயத்தில் பங்கேற்கும் நடிகர் அஜித்குமாருக்கு துணை முதல்வர் உதயநிதி ஸ்டாலின் தனது வாழ்த்துகளைத் தெரிவித்துள்ளார்.

நடிப்பைத் தாண்டி நடிகர் அஜித் கார், பைக் ரேஸ் மற்றும் விமானம் ஓட்டுவதில் அலாதி ஆர்வம் கொண்டவர். உடல்நிலைப் பிரச்சினை காரணமாக கடந்த சில ஆண்டுகளாக கார் ரேஸிங்கில் கலந்து கொள்ளாமல் இருந்தார். இப்போது துபாயில் நடைபெற இருக்கும் கார் பந்தயத்தில் தனது அணியினருடன் மீண்டும் களமிறங்குகிறார் அஜித். தனது அணிக்கு ‘அஜித்குமார் ரேசிங்’ எனப் பெயரிட்டிருப்பதுடன் புதிய லோகோவையும் அறிமுகப்படுத்தியிருக்கிறார்.

இதற்காக அஜித்திற்கு வாழ்த்து சொல்லி துணை முதல்வர் உதயநிதி ஸ்டாலின் தனது எக்ஸ் பக்கத்தில் ட்வீட் ஒன்றைப் பதிவிட்டிருக்கிறார். அதில், ‘உலக அளவில் சிறப்புக்குரிய 24H Dubai 2025 & The European 24H Series Championship - Porsche 992 GT3 Cup Class கார் பந்தயத்தில் பங்கேற்கவுள்ள நடிகரும், நண்பருமான அஜித்குமார் அவர்களுக்கு எங்களுடைய மனமார்ந்த வாழ்த்துகளைத் தெரிவித்துக் கொள்கிறோம். நம்முடைய தமிழ்நாட்டு விளையாட்டு ஆணையத்தின் (SDAT) லோகோவை ‘அஜித்குமார் ரேசிங்’ யூனிட்டின், கார், ஹெல்மெட் மற்றும் பந்தயம் தொடர்பான உபகரணங்களில் காட்சிப்படுத்தப்பட்டுள்ளதை அறிந்து மட்டற்ற மகிழ்ச்சி அடைந்தோம்.

இதன்மூலம், தமிழ்நாடு விளையாட்டு மேம்பாட்டுத்துறையை உலக அரங்கில் பெருமைப்படுத்தி, ஊக்குவித்துள்ள அஜித்துக்கு தமிழக விளையாட்டுத் துறை சார்பாக எங்களது நன்றியைத் தெரிவித்துக்கொள்கிறோம். மேலும், முதலமைச்சர் ஸ்டாலின் அவர்கள் தலைமையிலான நமது திராவிட மாடல் அரசு செயல்படுத்தி வரும் பல்வேறு மக்கள் நலத்திட்டங்கள் ஃபார்முலா4 சென்னை ரேசிங் ஸ்ட்ரீட் சர்கியூட் போன்ற முன்னெடுப்புகளை வாழ்த்திய அஜித் சாருக்கு எங்கள் அன்பும், நன்றியும். விளையாட்டுத்துறையில் தமிழ்நாட்டை உலக அரங்கில் உயர்த்திட ஒன்றிணைந்து செயல்படுவோம். கார்பந்தய போட்டியில் வென்று தமிழ்நாட்டுக்கு நீங்கள் பெருமை சேர்த்திட வாழ்த்துகள் அஜித் சார்’ எனத் தெரிவித்திருக்கிறார்.

தவறவிடாதீர்!

x