புதுடெல்லி: இஸ்ரேல்–லெபனான் இடையிலான போர் நிறுத்த ஒப்பந்தம் நேற்று முதல் அமலுக்கு வந்ததுள்ளது. இந்த ஒப்பந்தத்தை இந்தியா வரவேற்றுள்ளது.
பாலஸ்தீனத்தின் காசா பகுதியில் செயல்பட்டு வரும் ஹமாஸ் தீவிரவாதிகளுக்கும் இஸ்ரேலுக்கும் கடந்த ஆண்டு அக்டோபரில் போர் ஏற்பட்டது. இதில் ஹமாஸுக்கு ஆதரவாக இஸ்ரேல் மீது லெபனானின் ஹிஸ்புல்லா அமைப்பு தாக்குதல் நடத்தியது. இதையடுத்து லெபனான் மீது இஸ்ரேல் வான்வழி தாக்குதல் நடத்தியது. இதில் இதுவரை சுமார் 3,750 பேர் உயிரிழந்தனர். இரு நாடுகளிலும் ஆயிரக்கணக்கானோர் இடம் பெயர்ந்துள்ளனர். இந்நிலையில் அமெரிக்கா, பிரான்ஸ் ஆகிய நாடுகளின் மத்தியஸ்த முயற்சியால் இஸ்ரேலுக்கும் ஹிஸ்புல்லா அமைப்புக்கும் இடையே 2 மாத போர் நிறுத்த ஒப்பந்தம் ஏற்பட்டுள்ளது.
இதன்படி தெற்கு லெபனானில் இருந்து ஹிஸ்புல்லா தனது ஆயுத குழுக்களை விலக்கிக் கொள்ளும். இதுபோல் இஸ்ரேலும் அங்கிருந்து தனது படைகளை திரும்பப் பெறும். தெற்கு லெபனானில் அந்நாட்டு ராணுவ வீரர்களும் ஐ.நா. அமைதிப் படையினரும் நிறுத்தப்படுவார்கள். அமெரிக்கா தலைமையிலான சர்வதேச குழு போர் நிறுத்த நடைமுறைகளை கண்காணிக்கும். ஒப்பந்தத்தை ஹிஸ்புல்லா மீறினால் தாக்குதல் நடத்தும் உரிமை தங்களுக்கு உள்ளதாக இஸ்ரேல் கூறியுள்ளது.
இந்நிலையில் இந்த போர் நிறுத்த உடன்பாட்டை இந்தியா வரவேற்றுள்ளது.இதுகுறித்து வெளியுறவு அமைச்சகம் வெளியிட்டுள்ள செய்திக்குறிப்பில், “பதற்றத்தை தணிக்கவும், கட்டுப்பாட்டுடன் நடந்து கொள்ளவும் பேச்சுவார்த்தை மற்றும் ராஜதந்திர பாதைக்கு திரும்பவும் நாங்கள் தொடர்ந்து அழைப்பு விடுத்து வந்தோம். இந்த முன்னேற்றம், இந்த பரந்த பிராந்தியத்தில் அமைதி மற்றும் ஸ்திரத்தன்மைக்கு வழிவகுக்கும் என்று நாங்கள் நம்புகிறோம்” என்று கூறப்பட்டுள்ளது. இந்த ஒப்பந்தம் காசாவில் நடந்து வரும் மோதலை உள்ளடக்கவில்லை.
» பிரதமரின் விஸ்வகர்மா திட்டத்தை செயல்படுத்த மாட்டோம்: மத்திய அமைச்சருக்கு முதல்வர் ஸ்டாலின் கடிதம்
» எங்கள் குடும்பத்தின் தலைவர் மோடிதான்; அவரது முடிவை ஏற்பேன்: ஏக்நாத் ஷிண்டே கருத்து