நடனமாடியபடி சர்வதேச விண்வெளி நிலையத்துக்குள் நுழைந்த சுனிதா வில்லியம்ஸ்

சென்னை: அமெரிக்காவின் புளோரிடா மாகாணத்தில் உள்ள கென்னடி விண்வெளி மையத்திலிருந்து போயிங் ஸ்டார்லைனரில் விண்ணுக்குச் சென்ற சுனிதா வில்லியம்ஸ், இந்திய நேரப்படி வியாழக்கிழமை (ஜூன் 6) இரவு 11 மணி அளவில் சர்வதேச விண்வெளி நிலையத்தை வெற்றிகரமாக அடைந்தார்.

சர்வதேச விண்வெளி நிலையத்தை அவர் அடைந்த போது உற்சாகத்துடன் அதனை துள்ளல் நடனத்துடன் விண்வெளி நிலையத்துக்குள் உள்ளே நுழைந்து கொண்டாடினார். அப்போது அவரை சக விண்வெளி வீரர்கள் ஆரத்தழுவி வரவேற்றனர். அவருடன் பேரி வில்மோரும் சென்றுள்ளார். இந்த நிகழ்வினை போயிங் ஸ்பேஸ் நிறுவனம் எக்ஸ் தளத்தில் பகிர்ந்துள்ளது.

அமெரிக்காவின் புளோரிடா மாகாணத்தில் உள்ள கென்னடி விண்வெளி மையத்திலிருந்து புறப்பட்ட போயிங் ஸ்டார்லைனர் விண்கலனில் இருவரும் சுமார் 27 மணி நேரம் பயணித்து சர்வதேச விண்வெளி நிலையத்தை அடைந்துள்ளனர். அங்கு சுமார் 8 நாட்கள் தங்கியிருந்து ஆய்வு பணிகளை மேற்கொள்ள உள்ளனர். ஸ்டார்லைனரின் இந்த வெற்றிப் பயணம் ஸ்பேஸ் எக்ஸ் நிறுவனத்துக்கு கடுமையான போட்டியாக அமையும் என எதிர்பார்க்கப்படுகிறது.

ஸ்டார்லைனர் விண்கலனை நாசாவுக்காக போயிங் நிறுவனம் வடிவமைத்தது. பல ஆண்டுகளுக்கு முன்பே இந்த விண்கலனில் விண்வெளி வீரர்களை அனுப்புவது என நாசா திட்டமிட்டது. இருந்தும் பலமுறை அந்த திட்டம் கைவிடப்பட்டது. இந்த சூழலில் தற்போது அதன் முதல் பயணம் சக்சஸ் ஆகியுள்ளது.