கச்சநத்தம் மோதலில் இறந்தவர் மகனுக்கு அரசு வேலை கேட்டு வழக்கு - சிவகங்கை ஆட்சியர் ஆஜராக உத்தரவு 

மதுரை: கச்சநத்தம் சம்பவத்தில் இறந்தவர் மகனுக்கு அரசு வேலை கேட்ட வழக்கில் சிவகங்கை ஆட்சியர் நேரில் ஆஜராக உயர் நீதிமன்றம் உத்தரவிட்டுள்ளது.

சிவகங்கை மாவட்டம் கச்சநத்தம் பகுதியைச் சேர்ந்த ஸ்ரீதேவி, உயர் நீதிமன்ற மதுரை அமர்வில் தாக்கல் செய்த மனு: 'கச்சநத்தம் கிராமத்தில் கோயில் திருவிழா முன்விரோதத்தில் கடந்த 28.5.2018ல் பட்டியலின மக்கள் வாழும் பகுதியில் இரவில் 30க்கும் மேற்பட்டவர்கள் திடீரென தாக்குதல் நடத்தினர். இதில் 3 பேர் உயிரிழந்தனர். இந்த தாக்குதலில் காயமடைந்த என் கணவர் ஒன்றரை ஆண்டுக்கு பிறகு சிகிச்சை பலனின்றி இறந்தார். என் மகன் சுகுமாறன் தீவிர சிகிச்சைக்கு பிறகு உயிர் பிழைத்தார். இந்த கொலை வழக்கில் 27 பேருக்கு சிவகங்கை நீதிமன்றம் 2022-ல் தண்டனை விதித்தது.

சாதி மோதலில் பாதிக்கப்பட்டவர்கள் என்ற முறையில் எனது மகன் கோபாலகிருஷ்ணனுக்கு அரசு வேலை கேட்டு சிவகங்கை மாவட்ட ஆட்சியரிடம் விண்ணப்பித்தோம். அந்த விண்ணப்பம் நிராகரிக்கப்பட்டது. இதனால் உயர் நீதிமன்ற மதுரை அமர்வில் வழக்கு தொடர்ந்தோம். அந்த வழக்கில் என் மகனுக்கு அரசு வேலை வழங்க உத்தரவிடப்பட்டது. இருப்பினும் என் கணவரின் பிரேத பரிசோதனை அறிக்கை தாக்கல் செய்யவில்லை என்று கூறி என் மகனுக்கு வேலை கேட்ட விண்ணப்பத்தை மீண்டும் அதிகாரிகள் நிராகரித்துள்ளனர். இதை ரத்து செய்து என் மகன் கோபாலகிருஷ்ணனுக்கு அரசு வேலை வழங்க உத்தரவிட வேண்டும்.' இவ்வாறு மனுவில் கூறப்பட்டிருந்தது.

இந்த மனு நீதிபதி பட்டு தேவானந்த் முன்பு இன்று விசாரணைக்கு வந்தது. மனுதாரர் தரப்பில், ''சாதி மோதலில் கொல்லப்பட்ட தந்தையின் பிரேத பரிசோதனை அறிக்கை சமர்ப்பிக்கவில்லை என்று கூறி மாவட்ட ஆட்சியர் பணி வழங்க மறுத்துவிட்டார். அரசின் நிவாரண நிதி வழங்கப்பட்டுள்ளது. இதனால் அரசு பணி வழங்க உத்தரவிட வேண்டும்'' என வாதிடப்பட்டது. இதையடுத்து மனு குறித்து சிவகங்கை மாவட்ட ஆட்சியர் ஏப். 21-ம் நேரில் ஆஜராக உத்தரவிட்டு விசாரணையை நீதிபதி ஒத்திவைத்தார்.