சென்னை: தோட்டக்கலைத்துறை சார்பில், சென்னை, செம்மொழிப் பூங்காவில் 4-வது மலர்க்காட்சியை முதல்வர் மு.க.ஸ்டாலின் நேற்று தொடங்கி வைத்தார்.
இதுகுறித்து தமிழக அரசு வெளியிட்ட செய்திக்குறிப்பு:ஆண்டுதோறும் மே மாதத்தில் நீலகிரி, கொடைக்கானல், ஏற்காடு போன்ற மலைவாசஸ்தலங்களில் உள்ள பூங்காக்களில் கோடைவிழா மற்றும் மலர்க்காட்சிகள் நடத்தப்படுகின்றன. இவை சுற்றுலாப் பயணிகளை வெகுவாக ஈர்த்து வருகிறது. இதேபோல், சென்னை மக்களைக் கவரும் வகையில் கடந்த 2022-ம் ஆண்டு முதல் மலர்க்காட்சி நடத்தப்பட்டு வருகிறது, இதை ஆயிரக்கணக்கான மக்கள் கண்டு ரசித்தனர்.
கலைவாணர் அரங்கில் 2022 ஜூன் 3 முதல் 5-ம் தேதி வரை நடைபெற்ற மலர்க்காட்சியை 44,888 பார்வையாளர்கள் கண்டுகளித்தனர். 2023-ம் ஆண்டு செம்மொழிப்பூங்கவில் ஜூன் 3 முதல் 5 வரை நடைபெற்ற மலர்க்காட்சியை 23,302 பார்வையாளர்கள் ரசித்தனர். இக்காட்சிகளில் பல்வேறு வண்ண அயல்நாட்டு மற்றும் பூர்வீக கொய்மலர்கள், பழங்கள் மற்றும் காய்கறிகள் காட்சிப்படுத்தப்பட்டன.
தொடர்ந்து, 3-வது மலர்க்காட்சி செம்மொழி பூங்காவில் கடந்தாண்டு பிப்.10 முதல் 20 வரை 11 நாட்கள் நடைபெற்றது. இதனை 1,09,027 பேர் கண்டுகளித்தனர். தற்போது 4-வது மலர்க்காட்சி செம்மொழிப்பூங்காவில் நடைபெறுகிறது. இதில், பெட்டுனியா, சால்வியா, செவ்வந்தி, ரோஜா, பெகோனியா, ஆந்தூரியம், பெண்டாஸ், சாமந்தி, டயாந்தஸ், சினியா, டொரினியா, கேலண்டுலா, பால்சம், ஹைட்ராஞ்சியா, பாய்ன்செட்டியா போன்ற 50-க்கும்மேற்பட்ட வண்ண பூச்செடி வகைகளுடன் அலங்கரிக்கப்பட்ட யானை, பட்டாம்பூச்சி, ரயில் பெட்டி, கப்பல் உள்ளிட்ட 20-க்கும் மேற்பட்ட வடிவங்கள் இடம்பெற்றுள்ளன.
» மேஷம் முதல் மீனம் வரை இன்றைய ஒரு வரி ராசிபலன் @ ஜன. 03, 2025
» அரையாண்டு விடுமுறை முடிந்து பள்ளிகள் மீண்டும் திறப்பு: 3-ம் பருவத்துக்கான பாடநூல்கள் விநியோகம்
மேலும், டிரசினா, பைகஸ், கோலியஸ், அரேலியா, கார்டிலைன், அக்லோனிமா, எராந்திமம், ஃபிலோடென்ட்ரான் போன்ற பல்வேறு அலங்கார இலைத்தாவரங்களும் காட்சிப்படுத்தப்பட்டுள்ளன.
இந்த மலர்க்காட்சியை, முதல்வர் மு.க.ஸ்டாலின் நேற்று திறந்து வைத்தார். தொடர்ந்து, பூங்காவில் நடைபெற்ற இசை நிகழ்ச்சியையும் பார்வையிட்டார். இம்மலர்க்காட்சி, ஜன.18 வரை நடைபெறும். செம்மொழிப்பூங்காவில் காலை 10 முதல் மாலை 6 மணிவரை இதற்கான நுழைவுச்சீட்டு வழங்கப்படும்.
மேலும் ‘https://tnhorticulture.in/spetickets/’ என்ற இணையதளம் வாயிலாகவும் நுழைவுச்சீட்டு பெற வழிவகை செய்யப்பட்டுள்ளது.இந்நிகழ்ச்சியில், அமைச்சர்கள் துரைமுருகன், எம்.ஆர்.கே.பன்னீர்செல்வம், பி.கே.சேகர்பாபு, மேயர் ஆர்.பிரியா, தலைமைச் செயலர் நா.முருகானந்தம், வேளாண் துறை செயலர் அபூர்வா, வேளாண் இயக்குநர் பி.முருகேஷ், தோட்டக்கலைத்துறை இயக்குநர் பெ.குமாரவேல் பாண்டியன் பங்கேற்றனர்.