சென்னை: இந்திய இறையாண்மைக்கு எதிராக பேசியதாக, நாம் தமிழர் கட்சி ஒருங்கிணைப்பாளர் சீமானுக்கு எதிராகப் பதியப்பட்ட வழக்கை விரைந்து விசாரிக்கும்படி கீழமை நீதிமன்றத்துக்கு உயர் நீதிமன்றம் உத்தரவிட்டுள்ளது.
தமிழக மீனவர்களைத் தாக்கிய இலங்கை ராணுவத்தைக் கண்டித்து கடந்த 2010-ம் ஆண்டு நாம் தமிழர் கட்சி சார்பில் சென்னை மாவட்ட ஆட்சியர் அலுவலகம் முன்பாக ஆர்ப்பாட்டம் நடந்தது. அதில் பேசிய அக்கட்சியின் ஒருங்கிணைப்பாளர் சீமான், இந்திய இறையாண்மைக்கு எதிராக, இரு சமூகத்தினருக்கு இடையே மோதலை உருவாக்கும் வகையில் பேசியதாக அவர் மீது போலீஸார் வழக்குப்பதிவு செய்தனர். அந்த வழக்கில் கைதான அவர், பின்னர் ஜாமீனில் விடுவிக்கப்பட்டார்.
சென்னை ஜார்ஜ் டவுன் நீதிமன்றத்தில் நிலுவையில் உள்ள இந்த வழக்கை ரத்து செய்யக் கோரி சீமான் கடந்த 2021-ம் ஆண்டு சென்னை உயர் நீதிமன்றத்தில் மனு தாக்கல் செய்திருந்தார். இந்த மனு மீதான விசாரணை நீதிபதிகள் எஸ்.எம்.சுப்ரமணியம், எம்.ஜோதிராமன் ஆகியோர் அடங்கிய அமர்வில் நடைபெற்றது. அப்போது காவல்துறை தரப்பில் ஆஜரான அரசு குற்றவியல் வழக்கறிஞர் ராஜ்குமார், இந்த வழக்கில் 13 சாட்சிகள் விசாரிக்கப்பட்டுள்ளதால் வழக்கை ரத்து செய்யக்கூடாது என வாதிட்டார்.
அப்போது நாம் தமிழர் கட்சி சார்பில் ஆஜரான வழக்கறிஞர் எஸ்.சங்கர், சாட்சிகள் விசாரணை தொடங்கி விட்டதால் இந்த மனுவை திரும்பப் பெறுவதாக தெரிவித்தார். அதைப்பதிவு செய்து கொண்ட நீதிபதிகள், வழக்கை திரும்பப்பெற அனுமதியளித்தனர். அதேநேரம் இந்த வழக்கை விரைந்து விசாரித்து முடிக்க வேண்டும் என கீழமை நீதிமன்றத்துக்கு உத்தரவிட்டுள்ளனர்.