தஞ்சாவூர்: தொடர் மழையால் பயிர்களின் பாதிப்பு 33 சதவீதம் அளவுக்கு மேல் இருந்தால் இழப்பீடு வழங்கப்படும் என்று வேளாண்மைத் துறை அமைச்சர் எம்.ஆர்.கே.பன்னீர்செல்வம் கூறினார்.
தஞ்சாவூர், திருவாரூர், நாகை, மயிலாடுதுறை மாவட்டங்களில் கடந்த 2 நாட்களாக தொடர்ந்து மழை பெய்தது. இதனால், இளம்சம்பா, தாளடி நெற்பயிர்கள் நீரில் மூழ்கியுள்ளன. இந்நிலையில், தஞ்சாவூர் மாவட்டம் உக்கடை பகுதியில் மழையால் மூழ்கிஉள்ள நெற்பயிர்களை அமைச்சர்கள் எம்.ஆர்.கே.பன்னீர்செல்வம், கோவி.செழியன் ஆகியோர் நேற்று ஆய்வு செய்தனர்.
அப்போது, நீரில் மூழ்கி சேதமடைந்த பயிர்களை அமைச்சரிடம் விவசாயிகள் காண்பித்து, உரிய நிவாரணம் வழங்குமாறு கோரிக்கை விடுத்தனர். பின்னர் அமைச்சர் எம்.ஆர்.கே.பன்னீர் செல்வம் செய்தியாளர்களிடம் கூறியதாவது: தொடர் மழையால் தஞ்சை மாவட்டத்தில் 2,367 ஏக்கர், மயிலாடுதுறை, கடலூர் மாவட்டங்களில் 8,250 ஏக்கர், நாகை மாவட்டத்தில் 19,202 ஏக்கர், திருவாரூர் மாவட்டத்தில் 2,395 ஏக்கர், ராமநாதபுரம் மாவட்டத்தில் 2,055 ஏக்கர், திருவண்ணாமலை மாவட்டத்தில் 87 ஏக்கர் என தமிழகம் முழுவதும் 34,356 ஏக்கர் நெற்பயிர்கள் நீரில் மூழ்கியது முதல்கட்ட கணக்கீட்டில் தெரியவந்துள்ளது.
வேளாண் துறை மற்றும் வருவாய்த் துறை அதிகாரிகள், மழைநீரில் மூழ்கி சேதமடைந்துள்ள பயிர்களின் விவரங்களை கணக்கீடு செய்யும் பணியில் தொடர்ந்து ஈடுபட்டு வருகின்றனர். பயிர்களில் 33 சதவீதம் அளவுக்கு மேல் பாதிப்பு இருந்தால், உரிய இழப்பீடு வழங்க நடவடிக்கை எடுக்கப்படும். மழைநீர் சூழ்ந்த குடியிருப்புகளில் வசிக்கும் மக்களை பாதுகாப்பான இடங்களில் தங்கவைக்க ஏற்பாடு செய்யப்பட்டுள்ளது. அந்தந்த மாவட்ட பொறுப்பு அமைச்சர்கள், மாவட்ட ஆட்சியர்கள், மாவட்ட கண்காணிப்பு அலுவலர்கள் உள்ளிட்டோர் பாதிக்கப்பட்ட இடங்களுக்குச் சென்று ஆய்வு செய்து நடவடிக்கை எடுக்க வேண்டும் என்று ஏற்கெனவே முதல்வர் உத்தரவிட்டிருந்தார்.
மழைக்காலம் தொடங்கும் முன்பே ‘சி’ மற்றும் ‘டி’ பிரிவு வாய்க்கால்கள் தூர் வாரப்பட்டுள்ளன. இப்பணிக்கு தஞ்சாவூர் மாவட்டத்தில் மட்டும் ரூ.75 கோடி நிதி ஒதுக்கப்பட்டிருந்தது. இவ்வாறு அவர் கூறினார்.
தொடர்ந்து, ஒரத்தநாடு அருகே ஒக்கநாடு கீழையூர் பகுதியில் மழைநீரில் பயிர்கள் மூழ்கிஉள்ள பகுதிகளை அமைச்சர்கள் ஆய்வு செய்தனர். மாநிலங்களவை உறுப்பினர் எஸ்.கல்யாணசுந்தரம், மாவட்ட கண்காணிப்பு அலுவலர் எம்.அரவிந்த், மாவட்ட ஆட்சியர் பா.பிரியங்கா பங்கஜம், திருவையாறு எம்எல்ஏ துரை.சந்திரசேகரன் மற்றும் அதிகாரிகள் உடனிருந்தனர்.