சிவகாசி: சிவகாசியில் சிறுவர்கள் பட்டாசு வெடித்த போது, குழந்தைகளுக்கு பட்டாசு வாங்கி வந்த தொழிலாளி மீது தீப்பொறி பட்டு காயமடைந்தார். சிகிச்சைக்காக மருத்துவமனையில் சேர்க்கப்பட்ட அந்த தொழிலாளி சிகிச்சை பலனின்றி இன்று காலை உயிரிழந்தார்.
சிவகாசி புதுத்தெருவை சேர்ந்தவர் காளிராஜன் (52). பட்டாசு தொழிலாளியான இவர் கடந்த 30ம் தேதி தீபாவளி பண்டிகைக்காக வீட்டிற்கு பட்டாசு வாங்கி வந்துள்ளார். அப்போது வழியில் சிறுவர்கள் வெடித்த பட்டாசு தீப்பொறி காளிராஜன் மீது பட்டுள்ளது. இதில், அவர் வாங்கி வந்த பட்டாசுகள் தீப்பற்றி வெடித்து காளிராஜன் மீது தீ பற்றியது.
இதில் 90 சதவீதம் தீக்காயமடைந்த காளிராஜன் சிவகாசி அரசு மருத்துவமனையில் சேர்க்கப்பட்டார். அங்கு தொடர் சிகிச்சையில் இருந்த காளிராஜன் இன்று காலை சிகிச்சை பலனின்றி உயிரிழந்தார். இச்சம்பவம் குறித்து சிவகாசி நகர் போலீசார் வழக்குப் பதிவு செய்து விசாரணை நடத்தி வருகின்றனர்.