தவெக மாநாடு வெற்றிகரம்: விஜய்க்கு ரஜினிகாந்த் வாழ்த்து

சென்னை: தவெக மாநாட்டை வெற்றிகரமாக நடத்தியுள்ள விஜய்க்கு ரஜினிகாந்த் வாழ்த்து தெரிவித்துள்ளார்.

நடிகர் ரஜினிகாந்த் ஆண்டுதோறும் தீபாவளியை முன்னிட்டு, ரசிகர்களுக்கு வாழ்த்து தெரிவிப்பது வழக்கம். தீபாவளி நாளில் அவரை சந்திக்கும் ஆர்வத்துடன், சென்னை போயஸ் தோட்டத்தில் உள்ள அவரது வீடு முன்பு ஏராளமான ரசிகர்கள் நேற்று முன்தினம் திரண்டிருந்தனர்.

கடந்த ஒரு மாதம் முன்பு, ரத்தக் குழாய் வீக்கம் காரணமாக சென்னையில் உள்ள தனியார் மருத்துவமனையில் சேர்க்கப்பட்ட ரஜினிக்கு அக்டோபர் 1-ம் தேதி ரத்தக் குழாயில் ‘ஸ்டென்ட்’ பொருத்தி சிகிச்சை அளிக்கப்பட்டது. இதனால், வாழ்த்து தெரிவிக்க வெளியே வருவாரா என்ற குழப்பத்துடன் ரசிகர்கள் காத்திருந்த நிலையில், காலை 9 மணி அளவில் வீட்டில் இருந்து ரஜினி வெளியே வந்தார். அவரை பார்த்ததும் ரசிகர்கள் ஆரவாரம் செய்தனர். மிகவும் உற்சாகமாக காணப்பட்ட அவர், ரசிகர்களை பார்த்து கையசைத்து தீபாவளி வாழ்த்துகளை தெரிவித்தார்.

பின்னர் செய்தியாளர்களிடம் பேசிய ரஜினி, ‘‘அனைவரும் மகிழ்ச்சியாக, ஆரோக்கியமாக, சந்தோஷமாக வாழ வேண்டும். அனைவருக்கும் என் தீபாவளி நல்வாழ்த்துகள். தமிழக வெற்றிக் கழகத்தின் முதல் மாநாடு குறித்து கேட்கிறீர்கள். மாநாட்டை மிகப்பெரிய அளவில் வெற்றிகரமாக நடத்தியுள்ளனர். நடிகர் விஜய்க்கு எனது வாழ்த்துகள்’’ என்று தெரிவித்தார்