உற்சாகமானதாக மாறியிருக்கிறது தீபாவளி பண்டிகை: வானதி சீனிவாசன் வாழ்த்து

கோவை: பாஜக தேசிய மகளிரணி தலைவர் மற்றும் எம்எல்ஏ வானதி சீனிவாசன் அனைவருக்கும் தீபாவளி வாழ்த்து தெரிவித்துள்ளார்.

இதுகுறித்து அவர் வெளியிட்டுள்ள அறிக்கையில் கூறியிருப்பதாவது: “இந்தியாவில் மட்டுமின்றி உலகெங்கும் வாழும் 100 கோடிக்கும் அதிகமான இந்துக்கள் கொண்டாடும் பண்டிகை தீபாவளி. இந்நாளில் அனைவருக்கும் இனிய தீபாவளி நல்வாழ்த்துகளை தெரிவித்துக் கொள்கிறேன். புத்தாடைகள், பட்டாசுகள், இனிப்புகள் என, தீபாவளி என்றாலே அனைவருக்கும் உற்சாகம்தான். அதுவும் குழந்தைகளுக்கு தீபாவளி தரும் உற்சாகத்தை யாராலும் தர முடியாது.

எவ்வளவு தான் அதர்மம் தலை தூக்கினாலும், இறுதியில் தர்மமே வெல்லும், தீயசக்திகள் வெற்றி பெற்றது போல தோன்றினாலும் இறுதியில் நல்ல சக்திகள் வெல்லும் என்ற உயர்ந்த தத்துவம் தான் தீபாவளி. தீய சக்திகளின் அழிவையும், நல்லவர்களின் வெற்றியையும் புத்தாடைகள், இனிப்புகள், பட்டாசுகளுடன் கொண்டாடி தீர்க்கிறோம். மத்தியில் தொடர்ந்து மூன்றாவது முறையாக பிரதமர் நரேந்திர மோடி தலைமையில் தேசிய ஜனநாயக கூட்டணி அமைந்த பிறகும் வரும் முதல் தீபாவளி இது.

கடந்த 10 ஆண்டு கால மோடி ஆட்சியில் இந்தியாவின் வளர்ச்சி பெரும் பாய்ச்சல் கண்டுள்ளது. கடந்த 10 ஆண்டுகளில் நிறைவேற்றப்பட்ட உள்கட்டமைப்பு வசதிகள் உலகை மிரளச் செய்துள்ளன. மக்களின் வாழ்க்கைத் தரமும் மேம்பட்டுள்ளது. இதனால் தீபாவளி போன்ற பண்டிகைகள் மேலும் உற்சாகமானதாக மாறியுள்ளது. இந்தியாவின் பொருளாதாரம் என்பது தீபாவளி வணிகத்தைச் சார்ந்துள்ளது.

தீபாவளிக்காக நாம் வாங்கும் புத்தாடைகள், இனிப்புகள், பட்டாசுகள் உள்ளிட்ட அனைத்துமே பலருக்கு வாழ்வளிக்கக் கூடியது. எனவே, அனைவரது வாழ்விலும் ஒளி வீச, பட்டாசுகள் வெடித்து, நண்பர்கள், உறவினர்களுக்கு இனிப்புகள் வழங்கி, ஆதரவற்றவர்களுக்கு புத்தாடைகள் கொடுத்து தீபாவளி கொண்டாடுவோம். இந்த தீபாவளி நாளில் அனைவரது வாழ்விலும் வளம் கொழிக்க நல்வாழ்த்துகளை தெரிவித்துக் கொள்கிறேன்” என அதில் தெரிவிக்கப்பட்டுள்ளது.