சென்னை: வட்டாட்சியர் பதவி உயர்வு விவகாரத்தில் தொடரப்பட்ட நீதிமன்ற அவமதிப்பு வழக்கில், வருவாய்த் துறை செயலர், ஆணையர் மற்றும் 3 மாவட்ட ஆட்சியர்கள் நேரில் ஆஜராக உயர் நீதிமன்றம் உத்தரவிட்டுள்ளது.
தமிழ்நாடு அரசுப் பணியாளர் தேர்வாணையம் மூலமாக தேர்வுசெய்யப்படும் அரசு ஊழியர்களுக்கு மதிப்பெண் அடிப்படையில் மட்டுமே பதவி உயர்வு வழங்க வேண்டும் என சென்னை உயர் நீதிமன்றம் ஏற்கெனவே தீர்ப்பளித்துள்ளது.
இந்த தீர்ப்பை எதிர்த்து தொடரப்பட்ட வழக்கை விசாரித்த உச்சநீதிமன்றம், சென்னை உயர் நீதிமன்றத்தின் தீர்ப்பை உறுதி செய்துள்ளது. ஆனால் கிருஷ்ணகிரி, செங்கல்பட்டு, காஞ்சிபுரம் மாவட்டங்களில் பணிபுரியும் துணைவட்டாட்சியர்களுக்கு இடஒதுக்கீட்டின் அடிப்படையில் வட்டாட்சியர்களாகப் பதவி உயர்வு வழங்கப் பட்டுள்ளது.
இதை எதிர்த்து செங்கல்பட்டு, கிருஷ்ணகிரி உள்ளிட்ட மாவட்டங்களைச் சேர்ந்த துணை வட்டாட்சியர்களான எஸ்.சீனிவாசன், வேலு, உள்ளிட்ட பலர், சென்னை உயர் நீதிமன்றத்தில் வழக்கு தொடர்ந்திருந்தனர்.
தமிழக அரசு அமல்படுத்தவில்லை: இந்த வழக்கை விசாரித்த உயர்நீதிமன்றம், இடஒதுக்கீட்டு முறையில் வட்டாட்சியர்களாகப் பதவி உயர்வு வழங்கி பிறப்பித்த உத்தரவை ரத்து செய்தது. ஆனால் அந்த உத்தரவை தமிழக அரசுஅமல்படுத்தவில்லை எனக்கூறி சம்பந்தப்பட்ட துணை வட்டாட்சியர்கள், உயர் நீதிமன்றத்தில் அவமதிப்பு வழக்கு தொடர்ந் திருந்தனர்.
இந்த அவமதிப்பு வழக்கு விசாரணை நீதிபதி ஜி.கே.இளந்திரை யன் முன்பாக விசாரணைக்கு வந்தது. அப்போது மனுதாரர்கள் சார்பில் மூத்த வழக்கறிஞர் ஜி.சங்கரனும், வழக்கறிஞர் எம்.லோகநாத னும் ஆஜராகி வாதிட்டனர்.
அதையடுத்து நீதிபதி, இந்த அவமதிப்பு வழக்கில் ஜூலை 27-ம் தேதி தமிழக அரசின் வருவாய்த் துறை செயலர் வி.ராஜாராமன், ஆணையர் எஸ்.கே.பிரபாகர், கிருஷ்ணகிரி மாவட்ட ஆட்சியர் கே.எம்.சராயு, காஞ்சிபுரம் மாவட்ட ஆட்சியர் கலைச்செல்வி மோகன், செங்கல்பட்டு மாவட்ட ஆட்சியர் எஸ்.அருண்ராஜ் ஆகியோர் நேரில் ஆஜராக வேண்டுமென உத்தரவிட்டுள்ளார்.
சம்பந்தப்பட்ட அதிகாரிகள் அன்றைய தினம் ஆஜராகவில்லை என்றால் பிடிவாரண்ட் பிறப்பிக் கப்படும் என எச்சரித்துள்ள நீதிபதி, விசாரணையை ஜூலை 27-க்கு தள்ளிவைத்துள்ளார்.