பஞ்சாப் சட்டப்பேரவைத் தேர்தல் பிரச்சாரத்துக்காக இன்று பதான்கோட் சென்றிருக்கும் பிரதமர் மோடி, அங்கு நடந்த பொதுக்கூட்டத்தில் பேசும்போது, “உங்களுக்குச் சேவை செய்ய எனக்கு ஐந்து ஆண்டுகள் கொடுங்கள். விவசாயம், வணிகம், தொழில் துறை ஆகியவற்றை லாபகரமானதாக மாற்றிக்காட்டுவேன் என உறுதியளிக்கிறேன்” என்று குறிப்பிட்டார். மேலும், “காங்கிரஸ் ஒரிஜினல் என்றால் ஆம் ஆத்மி கட்சி அதன் ஃபோட்டோகாப்பி (நகல்)” என்று அவர் சாடினார்.
“பஞ்சாப் மாநிலத்தை நாங்கள் ‘பஞ்சாபியத்’ (பஞ்சாப் தன்மை) எனும் கோணத்தில் பார்க்கிறோம். அதற்குத்தான் முன்னுரிமை கொடுக்கிறோம். ஆனால், எதிர்க்கட்சிகள் பஞ்சாபை அரசியல் பார்வையுடனேயே அணுகுகின்றன” என்று பேசிய மோடி, தேசப் பிரிவினை நிகழ்வைக் குறிப்பிட்டு காங்கிரஸை விமர்சிக்கவும் தயங்கவில்லை. குருநானக் நல்லடக்கம் செய்யப்பட்ட இடத்தில் உருவாக்கப்பட்ட கர்தார்புர் சாஹிப் குருத்வாராவை, தேசப் பிரிவினையின்போது இந்தியாவில் தக்கவைத்துக்கொள்ள காங்கிரஸ் தவறிவிட்டதாக அவர் குறிப்பிட்டார். கர்தார்புர் சாஹிப் குருத்வாரா பாகிஸ்தானின் நாரோவால் மாவட்டத்தில் இருக்கிறது.
இன்று சீக்கிய மத குருக்களில் ஒருவரான குரு ரவிதாஸ் ஜெயந்தி என்பதால், டெல்லியின் கரோல் பாக் பகுதியில் உள்ள குரு ரவிதாஸ் விஷ்ராம் கோயிலுக்குச் சென்று மோடி வழிபட்டார்.
அதைப் பற்றிப் பேசிய அவர், “இன்று குரு ரவிதாஸ் ஜெயந்தி. இங்கு வருவதற்கு முன்னர் ரவிதாஸ் கோயிலுக்குச் சென்று அவரது ஆசியை வேண்டினேன்” என்று குறிப்பிட்டார்.
1377-ல் உத்தரப் பிரதேசத்தின் வாராணசியில் பிறந்தவர் எனக் கருதப்படும் ரவிதாஸ், சாதி பேதமின்றி அனைவருக்குமான சமத்துவம், கண்ணியம் காக்கப்பட வேண்டும் எனும் நோக்கில் இயங்கியவர். பக்தி இயக்கத்தை வழிநடத்தியவர்.
பிப்ரவரி 10 முதல் 16-ம் தேதிவரை, ஏறத்தாழ 20 லட்சம் பக்தர்கள் வாராணசிக்குப் புனிதப் பயணம் மேற்கொள்வார்கள் என்பதால், தேர்தல் தேதியை மாற்றியமைக்க வேண்டும் என்று எனப் பஞ்சாப் முதல்வர் சரண்ஜீத் சிங் விடுத்த கோரிக்கையையடுத்து, பஞ்சாப் சட்டப்பேரவைத் தேர்தலை பிப்ரவரி 14-ம் தேதியிலிருந்து பிப்ரவரி 20-ம் தேதிக்குத் தள்ளிவைத்தது தேர்தல் ஆணையம்.
இந்நிலையில், உத்தர பிரதேசத்துக்கு வரும் பக்தர்களுக்குத் தேவையான அனைத்து ஏற்பாடுகளையும் யோகி ஆதித்யநாத் அரசு செய்திருப்பதாக மோடி குறிப்பிட்டார்.
“இரண்டு சிறப்பு ரயில்களை ரயில்வே ஏற்பாடு செய்திருக்கிறது. வாராணசி எம்.பி எனும் முறையில், நீங்கள் எனது விருந்தினராக வரும்போது அனைத்து வசதிகளும் உங்களுக்குக் கிடைப்பதை உறுதிசெய்வது எனது கடமை ஆகும்” என்றும் மோடி கூறினார்.