இன்று நொய்டா நகரில் நடைபெற இருக்கும் முக்கியத்துவம் வாய்ந்த புரோ கபடி போட்டியில், வாழ்வா சாவா ஆட்டத்தில் தமிழ் தலைவாஸ் அணி, யு மும்பா அணியுடன் மோதுகிறது.
ஐதராபாத்தில் தொடங்கிய புரோ கபடி போட்டியின் 11வது தொடரின் லீக் போட்டியில் தற்போது நொய்டாவில் நடைபெற்று வருகிறது.
இந்த போட்டியில் ஆரம்பத்தில் வெற்றியுடன் தொடங்கி விளையாடி வரும் தமிழ் தலைவாஸ் அணி புள்ளிப்பட்டியலில் முதல் 3 இடங்களில் மாறி மாறி இடம் பெற்றிருந்தது.
ஆனால் அதன் பின்னர் நடந்த அடுத்தடுத்த போட்டிகளில் தமிழ் தலைவாஸ் அணி தொடர்ந்து ஹாட்ரிக் தோல்வியை சந்தித்ததால் புள்ளிகள் பட்டியலிலும் சறுக்கியது ரசிகர்களை ஏமாற்றத்திற்குள்ளாக்கியது.
இந்நிலையில் இன்றைய போட்டியில் வெற்றி பெற்றால் தான் அடுத்த கட்டத்திற்கு முன்னேற முடியும் என்கிற இக்கட்டான நிலையில் யு மும்பா அணியை இன்று இரவு 9 மணிக்கு சந்திக்கிறது.
இதுவரை விளையாடியுள்ள 8 ஆட்டங்களில் 2ல் மட்டுமே வெற்றி பெற்றுள்ளது தலைவாஸ் அணி. அதனால் 21 புள்ளிகளுடன் 9வது இடத்தில் உள்ளது. அதே சமயம் யு மும்பா அணி இதுவரையில் விளையாடியுள்ள 9 ஆட்டங்களில் 5 வெற்றிகளை ருசித்துள்ளது. 3 தோல்வி, ஒரு சமன் என மொத்தம் 29 புள்ளிகளுடன் புள்ளிப்பட்டியலில் 3வது இடத்தை பிடித்துள்ளது.
இன்றைய ஆட்டத்தில் வெல்வதன் மூலம் மும்பா அணி முதல் இடத்துக்கு முன்னேறும் வாய்ப்பும் உள்ளது. அதே சமயம் தலைவாஸ் அணி, இனி ஆடும் போட்டிகளில் இன்றைய போட்டியில் வென்றால் மட்டுமே பிளே ஆப் சுற்றுக்கு முன்னேறும் வாய்ப்பை தமிழ் தலைவாஸ் அணி தக்க வைக்க முடியும் என்பதால் இன்றைய ஆட்டத்தில் விறுவிறுப்புக்கு பஞ்சமிருக்காது.
இந்த இரு அணிகளும் இதுவரை 11 முறை நேருக்கு நேர் களம் கண்டுள்ள நிலையில், அவற்றில் 7 ஆட்டங்களில் மும்பா அணியும், 3 ஆட்டங்களில் தமிழ் தலைவாஸ் அணியும் வென்றுள்ளன. ஒரு ஆட்டம் சமனில் முடிந்துள்ளது குறிப்பிடத்தக்கது.