மகளிர் பிரீமியர் லீக்... குஜராத் ஜெயன்ட்ஸை இன்று சந்திக்கும் உ.பி வாரியர்ஸ்!

மகளிருக்கான பிரீமியர் லீக் கிரிக்கெட் போட்டியில் குஜராத் அணியை உத்தரப்பிரதேச வாரியர்ஸ் அணி இன்று சந்திக்கிறது.

மகளிருக்கான பிரீமியர் லீக் கிரிக்கெட் போட்டி டெல்லியில் நடைபெற்று வருகிறது. இதில் பங்கேற்றுள்ள 5 அணிகளும் தங்களுக்குள் தலா 2 முறை மோத வேண்டும். லீக் சுற்று முடிவில் முதல் 3 இடங்களைப் பிடிக்கும் அணிகள் பிளே-ஆப் சுற்றுக்குள் நுழையும்.

அந்த வகையில் இந்த தொடரில் இன்று நடைபெறும் லீக் போட்டியில் குஜராத் ஜெயன்ட்ஸ் - உத்தரப்பிரதேச வாரியர்ஸ் அணிகள் நேருக்கு நேர் சந்திக்கவுள்ளன. மகளிருக்கான பிரீமியர் லீக் கிரிக்கெட் போட்டியில் இதுவரை நடந்துள்ள லீக் போட்டிகளின்படி, வாரியர்ஸ் அணி 7 போட்டிகளில் விளையாடி, 3 போட்டிகளில் வெற்றி பெற்றுள்ளது. 4-ல் தோல்வியைச் சந்தித்துள்ளது. எனவே, 6 புள்ளிகளுடன் இந்த புள்ளிப்பட்டியலில் 4-வது இடத்தில் உள்ளது.

இதேபோல் 6 போட்டிகளில் விளையாடியுள்ள குஜராத் அணி ஒன்றில் வெற்றியும், 5 போட்டிகளில் தோல்வியையும் சந்தித்துள்ளது. இதனால் 2 புள்ளிகளுடன் புள்ளிப்பட்டியலில் கடைசி இடத்தில் உள்ளது. இந்திய நேரப்படி இரண்டு அணிகளுக்கான போட்டி இரவு 7.30 மணிக்கு தொடங்குகிறது. தொடர் தோல்விகளைச் சந்தித்து வரும் குஜராத் அணி இந்த தொடரில் வெற்றிபெற கடுமையாக போராடும் என எதிர்பார்க்கப்படுகிறது.