சத் பூஜைக்காக பாடல் எழுதிய மேற்கு வங்க முதல்வர் மம்தா பானர்ஜி: இன்று வெளியீடு!

கொல்கத்தா: மேற்கு வங்க முதல்வர் மம்தா பானர்ஜி சத் பூஜைக்காக பாடல் எழுதியுள்ளதாக அறிவித்துள்ளார். இந்தப் பாடல் இன்று வெளியிடப்படும் எனவும் தெரிவிக்கப்பட்டுள்ளது.

கொல்கத்தாவில் பொதுமக்களிடம் நேற்று உரையாற்றிய மம்தா பானர்ஜி, “சத் பூஜைக்கு இரண்டு நாட்கள் விடுமுறை அளிக்கிறோம். பொறுமையாக இருந்து கங்கையில் பூஜையை நடத்தும்படி கேட்டுக்கொள்கிறேன். சத் பூஜைக்கு நான் ஒரு பாடல் எழுதியுள்ளேன். வியாழன் அன்று இப்பாடலை வெளியிடுவோம்.

மேற்கு வங்கம் ஒரு மினி இந்தியா. உங்களுக்கு பிஹார் அல்லது உ.பி.யில் வீடு இருக்கலாம். இங்கு நீங்கள் எப்போதாவது பிரச்சினைகளை எதிர்கொண்டதுண்டா? உங்கள் மதம் அல்லது ஜாதி பற்றி யாராவது கேள்வி எழுப்பியிருக்கிறார்களா? ஒருபோதும் இல்லை. நீங்கள் உடுத்துவதில், உண்பதில் அல்லது உங்கள் விஷயத்தில் நான் தலையிட்டதில்லை. நம்மிடம் வெவ்வேறு அம்சங்கள் இருக்கலாம், ஆனால் நாம் அனைவரும் சகோதர சகோதரிகள்” என்றார்

சூரியக் கடவுளுக்காக அனுசரிக்கப்படும் சத் பூஜை, மேற்கு வங்கத்தில் மிகுந்த உற்சாகத்துடன் கொண்டாடப்படுகிறது. சில நாட்களுக்கு முன்பு, மம்தா பானர்ஜி தனது இல்லத்தில் காளி பூஜையை மிகுந்த உற்சாகத்துடன் கொண்டாடினார். பாரம்பரிய சடங்குகளுடன் நடந்த இவ்விழாவில், பலரும் கலந்து கொண்டனர்.