திருச்சி அய்யாளம்மன் காவிரி படித்துறையில் ரூ.18.63 கோடி மதிப்பீட்டில் அமைக்கப்பட்டுள்ள பறவைகள் பூங்காவை துணை முதல்வர் உதயநிதி ஸ்டாலின் நேற்று திறந்து வைத்தார்.
திருச்சி மாவட்டம் அந்தநல்லூர் ஊராட்சி ஒன்றியம் கம்பரசம்பேட்டை ஊராட்சி அய்யாளம்மன் படித்துறை பகுதியில் நமக்கு நாமே திட்டத்தின் கீழ் 4.02 ஏக்கர் பரப்பளவில் ரூ.18.63 கோடி மதிப்பில் பறவைகள் பூங்கா அமைக்கப்பட்டுள்ளது. இதன் திறப்பு விழா நேற்று மாலை நடைபெற்றது. தமிழக துணை முதல்வர் உதயநிதி ஸ்டாலின் பங்கேற்று பூங்காவை திறந்து வைத்து பார்வையிட்டார்.
இதில், தமிழக அமைச்சர்கள் நகராட்சி நிர்வாகத் துறை கே.என்.நேரு, சட்டத் துறை எஸ்.ரகுபதி, பள்ளிக் கல்வித் துறை அன்பில் மகேஸ் பொய்யாமொழி, பிற்படுத்தப்பட்டோர் நலத்துறை சிவ.வீ.மெய்யநாதன், திருச்சி மேயர் மு.அன்பழகன், எம்எல்ஏக்கள் சவுந்தரபாண்டியன், ஸ்டாலின்குமார், தியாகராஜன், எம்.பழனியாண்டி, மாவட்ட ஆட்சியர் மா.பிரதீப்குமார், மாவட்ட வருவாய் அலுவலர் ராஜலட்சுமி, திட்ட இயக்குநர் மாவட்ட ஊரக வளர்ச்சி முகமை கங்காதாரிணி உள்பட பலர் கலந்து கொண்டனர்.
பூங்காவின் சிறப்பம்சங்கள்
இந்த பூங்காவில் 60 ஆயிரம் சதுர அடி பரப்பளவில் ஐந்திணை என்றழைக்கப்படும் குறிஞ்சி, முல்லை, மருதம், பாலை, நெய்தல் ஆகிய 5 வகை நில அமைப்புகளை விவரிக்கும் வகையில் அந்த நிலப்பகுதிகளுக்கான அடையாளங்கள் அமைக்கப் பட்டு, அங்கு பல்வேறு வகையான நூற்றுக்கணக்கான பறவைகள் விடப்பட்டுள்ளன. மேலும், அவை தங்குவதற்கென பிரத்யேகமாக வடிவமைக்கப்பட்ட குடில்கள் மற்றும் கூண்டுகள் அமைக்கப்பட்டுள்ளன.
மேலும், சுருள் ரெக்கை(FRILL BACK), பொமேரியன் பவுட்டர் (Pomeranian Pouter), கேடய பௌட்டர் (SHIELD POUTER), கிளி மூக்கு (SCANDAROON), வைர புறா (DIAMOND DOVE), நீண்ட முகம் டம்ளர் (Long Face Tumbler), கட்ட வால் (MALTESE), ஓரியன்டல் ஃபிரில் (ORIENTAL FRILL), பூ ரெக்கை (Spanish Chorrera), மூஞ்சி மூடி (JACOBIN), போண்டா புறா (Modena), சின்ன மூஞ்சி (Short face), அழகு ஹோமர் (Beauty homer ), கழுத்தசைப்பான்(Neck Shaker), கேரியர் புறா (Carrier pigeon), மாக்பை பெளட்டர் (MAGPIE Pouter), அரசன் (KING), செம்பு புறா (ARACHANGEL) ஆகிய புறா வகைகள் தனித்தனியே காட்சிப்படுத்தப்பட்டுள்ளன.
இதுதவிர, பல்வேறு வகையான கோழியினங்கள், வாத்துகள், கிளிகள், முயல்கள் காட்சிப்படுத்தப்பட்டுள்ளன. குழந்தைகளை கவரும் வகையில் கோய் மீன் குளம் (KOI FISH POND) அமைக்கப்பட்டுள்ளது. இது இந்தியாவிலேயே மிகப்பெரிய பறவைக் கூடம் என்பது குறிப்பிடத்தக்கது. மேலும் இங்கு பறவைகளின் இனப்பெருக்கத்திற்கென தனிக்கூடம் அமைக்கப்பட்டுள்ளது.
இங்கு அமைக்கப்பட்டுள்ள 7-டி மினி திரையரங்கில் பார்வையாளர்களுக்கு திரையிடப்படும் படங்கள் முப்பரிமாண காட்சிகளாக அருகில் தெரிவதுடன், காட்சிகளின் அமைப்புக்கு ஏற்ப தங்களைச் சுற்றி ஈரமாக உணர்வது, தங்கள் உடலை காற்று தழுவுவது, அதிர்வுகளை உணர்தல் உள்ளிட்ட சிறப்புகள் இடம் பெற்றுள்ளன. இங்கு ஒரே நேரத்தில் பொதுமக்கள் 50 பேர் அமர்ந்து பார்வையிடலாம். பூங்காவுக்குள் செல்ல நுழைவுக் கட்டணமாக பெரியவர்களுக்கு ரூ.200, சிறியவர்களுக்கு ரூ.150 நிர்ணயம் செய்யப்பட்டுள்ளது.