சென்னை: துல்கர் சல்மான் நடிப்பில் வெளியாகி ரசிகர்களிடையே வரவேற்பை பெற்ற ‘லக்கி பாஸ்கர்’ திரைப்படம் வரும் நவம்பர் 28-ம் தேதி ஓடிடியில் வெளியாக உள்ளது.
‘சீதா ராமம்’ படத்துக்குப் பிறகு தெலுங்கில் துல்கர் சல்மான் நடித்துள்ள படம் ‘லக்கி பாஸ்கர்’. இந்தப் படத்தை ‘சார்’ படத்தை இயக்கிய வெங்கி அட்லூரி இயக்கியுள்ளார். சித்தாரா என்டர்டெயின்மென்ட் நிறுவனம் தயாரித்துள்ள இந்தப் படத்தில் மீனாட்சி சவுத்ரி நாயகியாக நடித்துள்ளார். ராம்கி முக்கிய கதாபாத்திரத்தில் நடித்துள்ளார். ஜி.வி.பிரகாஷ் இசையமைத்துள்ள இந்தப் படம் தீபாவளி பண்டிகையை முன்னிட்டு கடந்த அக்டோபர் 31-ம் தேதி திரையரங்குகளில் வெளியானது.
தெலுங்கில் உருவாகி மற்ற மொழிகளுக்கு மொழிமாற்றம் செய்யப்பட்டது. தமிழகத்தில் குறைந்த திரையரங்குகளில் வெளியான இப்படம் ரசிகர்களிடையே பெற்ற வரவேற்பால் தொடர்ந்து திரையரங்குகளின் எண்ணிக்கையும், காட்சிகளும் அதிகரிக்கப்பட்டன. இதனால் படம் ரூ.100 கோடி வசூலித்து அசத்தியது. நடுத்தர குடும்பத்தைச் சேர்ந்த ஒருவர் பணம் சம்பாதிக்க மேற்கொள்ளப்படும் முயற்சிகளே கதை. இந்நிலையில் ‘லக்கி பாஸ்கர்’ வரும் நவம்பர் 28-ம் தேதி நெட்ஃப்ளிக்ஸ் ஓடிடியில் வெளியாகும் என அதிகாரபூர்வமாக அறிவிக்கப்பட்டுள்ளது.