திருவனந்தபுரம்: கன்னியாகுமரியில் வசித்த கேரள பெண் கிரீஷ்மா. இவர் கல்லூரியில் படிக்கும் போது திருவனந்தபுரத்தைச் சேர்ந்த ஷரோன் ராஜ் என்ற வாலிபரை காதலித்து வந்தார். இந்நிலையில் கிரீஷ்மாவுக்கு, ராணுவ அதிகாரி ஒருவருடன் திருமணம் நிச்சயமானது.
காதலன் ஷரோன் ராஜ் உடனான தொடர்பை துண்டிக்க விரும்பிய கிரீஷ்மா, அவரை கொலை செய்வதுதான் பிரச்சினையிலிருந்து விடுபடுவதற்கு ஒரே தீர்வு என முடிவு செய்தார். அவருக்கு குளிர்பானத்தில் வலி நிவாரண மாத்திரை, தூக்க மாத்திரைகளை கலந்து கொடுத்தும் பலன் அளிக்கவில்லை. இந்நிலையில் கடந்த 2022ம் ஆண்டு அக்டோபர் 14ம் தேதி ஷரோன் ராஜை தனது வீட்டுக்கு அழைத்த கிரீஷ்மா அவருக்கு மூலிகை விஷங்களை கலந்து ஆயூர்வேத பானம் கொடுத்தார்.
அதை குடித்த ஷரோன் ராஜின் உடல் உறுப்புகள் செயல் இழந்து இறந்தார். போலீஸ் விசாரணையில் கொலை குற்றத்தை ஒப்புக் கொண்ட கிரீஷ்மா ஓராண்டு சிறை தண்டனை அனுபவித்து ஜாமீனில் வெளிவந்தார். கேரளாவின் நெய்யாற்றின்கரை
நீதிமன்றத்தில் நடைபெற்று வந்த இந்த வழக்கில் கடந்த வெள்ளிக்கிழமை தீர்ப்பளிக்கப்பட்டது. அதில் கிரீஷ்மாவை குற்றவாளி என நீதிபதி அறிவித்தார்.
இதனிடையே இன்று குற்றவாளி கிரீஷ்மாவிற்கு தூக்கு தண்டனை விதித்து நீதிமன்றம் உத்தரவு பிறப்பித்துள்ளது.
» டெல்லி கண்காட்சியில் 2 நாளில் 90 வாகனம் அறிமுகம்
» கேஜ்ரிவால் கார் மீது கற்கள் வீசி தாக்குதல்; டெல்லியில் பரபரப்பு - பாஜக மீது குற்றச்சாட்டு!