அரசியலமைப்பு சட்டம்தான் இந்தியாவின் டிஎன்ஏ: மகாராஷ்டிர தேர்தல் பிரச்சாரத்தில் ராகுல் காந்தி பேச்சு

அமராவதி: அரசியலமைப்பு சட்டம்தான் இந்தியாவின் டிஎன்ஏ, ஆனால் அதை பாஜகவும், ஆர்எஸ்எஸ் அமைப்பும் வெற்றுப் புத்தகமாக கருதுகின்றன என்று மக்களவை எதிர்க்கட்சித் தலைவரும், காங்கிரஸ் கட்சியின் மூத்த தலைவருமான ராகுல் காந்தி தெரிவித்தார்.

மகாராஷ்டிர மாநில சட்டப் பேரவைக்கான தேர்தல் வரும் 20-ம் தேதி நடைபெறவுள்ளது. இதையொட்டி அமராவதியில் நேற்று நடைபெற்ற தேர்தல் பிரச்சாரத்தில் ராகுல் காந்தி கலந்துகொண்டு பேசியதாவது: மகாராஷ்டிராவில் சிவசேனா (உத்தவ்), தேசியவாத காங்கிரஸ் (சரத் பவார்), காங்கிரஸ் தலைமையிலான மகா விகாஸ் அகாடி கூட்டணி ஆட்சி சிறப்பாக நடைபெற்று வந்தது. ஆனால் இரண்டு கட்சிகளை உடைத்த பாஜக, பின்வாசல் வழியாக ஆட்சிக்கு வந்து விட்டது.

தற்போது மாற்றத்துக்கான நேரம் வந்துவிட்டது. நாம் யாரென்று அவர்களுக்குக் காட்டுவோம். மகா விகாஸ் அகாடி கூட்டணிக்கு வாக்களிக்க மக்கள் காத்திருக்கின்றனர். இதன் மூலம் மகாராஷ்டிர மக்களுக்கு நன்மை கிடைக்கும். அரசியலமைப்பு சட்டம்தான் இந்தியாவின் டிஎன்ஏ-வாக உள்ளது. ஆனால் அதை பாஜகவும், ஆர்எஸ்எஸ் அமைப்பும் வெற்றுப் புத்தகமாக கருதுகின்றன. பாஜக அரசு மக்களுக்கான அரசு அல்ல. தொழிலதிபர்களுக்கான அரசாக உள்ளது. இதுவரை தொழிலதிபர்களின் 16 லட்சம் கோடி ரூபாய் கடனை மத்திய அரசு தள்ளுபடி செய்துள்ளது.

நினைவாற்றல் குறைந்துவிட்டது: சாதிவாரி கணக்கெடுப்பை நடத்தவேண்டும் என்றும் 50 சதவீத இடஒதுக்கீட்டை நீக்கவேண்டும் என்றும் நான் மக்களவையில் பேசினேன். ஆனால் நான் இடஒதுக்கீட்டுக்கு எதிரானவன் என்ற ரீதியில் பிரதமர் நரேந்திர மோடி பேசி வருகிறார். அவருக்கு முன்னாள் அமெரிக்க அதிபர் போல
நினைவாற்றல் (மெமரி லாஸ்) குறைந்துவிட்டது என்று நினைக்கிறேன். இப்போது சாதிவாரி கணக்கெடுப்புக்கு எதிரானவன் ராகுல் காந்தி என்று கூட பிரதமர் மோடி பேசக்கூடும்.

புகழை கெடுக்க முயற்சி: தலித்துகள், ஆதிவாசிகள், பிற்படுத்தப்பட்ட மக்களின் உரிமைக்காக நான் நிற்கிறேன். என்னுடைய புகழைக் கெடுக்க பாஜகவினர் கோடிக்கணக்கான ரூபாயை செலவழிக்கின்றனர். யாரைக் கண்டும் நான் அஞ்சமாட் டேன். மக்களின் நலனுக்காக தொடர்ந்து குரல் கொடுப்பேன். விவசாயிகளையும், சிறு வியாபாரிகளையும் கொல்வதற் காகவே ஜிஎஸ்டியும், பணமதிப் பிழப்பும் கொண்டு வரப்பட்டது.இவ்வாறு ராகுல் காந்தி பேசினார்.