கொல்கத்தா: அரசு மருத்துவமனையில் பாலியல் வன்கொடுமை செய்யப்பட்டு கொல்லப்பட்ட பெண் மருத்துவரின் பெற்றோருக்கு கொல்கத்தா காவல்துறை லஞ்சம் வழங்கியதாக எழுந்த குற்றச்சாட்டை மேற்கு வங்க முதல்வர் மம்தா பானர்ஜி மறுத்துள்ளார்.
பாலியல் வன்கொடுமை செய்யப்பட்டு கொல்லப்பட்ட பெண் மருத்துவரின் தந்தை, கொல்கத்தா காவல்துறை இந்த வழக்கை மூடிமறைக்க முயன்றதாக குற்றம் சாட்டினார். அவர், “காவல்துறையினர் ஆரம்பத்திலிருந்தே இந்த வழக்கை மூடிமறைக்க முயன்றனர். பிரேதப் பரிசோதனைக்காக உடலை எடுத்துச் செல்லும் போது நாங்கள் உடலைப் பார்க்க அனுமதிக்கப்படவில்லை, காவல் நிலையத்தில் காத்திருக்க வேண்டியிருந்தது. பின்னர், உடலை எங்களிடம் ஒப்படைத்தபோது, ஒரு மூத்த போலீஸ் அதிகாரி எங்களுக்கு பணம் கொடுத்தார், நாங்கள் உடனடியாக மறுத்துவிட்டோம்” என்று குற்றம் சாட்டினார்.
இதற்கு பதிலளித்த முதலமைச்சர் மம்தா பானர்ஜி, "இறந்த மருத்துவரின் குடும்பத்திற்கு நாங்கள் ஒருபோதும் பணம் வழங்கவில்லை, இது அவதூறு தவிர வேறில்லை. பணத்தால் ஒரு வாழ்க்கையை ஈடுகட்ட முடியாது என்று நான் பெற்றோரிடம் கூறியிருந்தேன். ஆனால் அவர்கள் எப்போதாவது தங்கள் மகளின் நினைவாக ஏதாவது அர்த்தமுள்ள ஒன்றைச் செய்ய வேண்டும் என்று நினைத்தால், அவர்கள் என்னை அணுகலாம்.
கொல்கத்தா போலீஸ் கமிஷனர் வினீத் கோயல், போராட்டங்களுக்குப் பிறகு ராஜினாமா செய்ய முன்வந்தார். ஆனால் துர்கா பூஜைக்கு முன்னதாக சட்டம் மற்றும் ஒழுங்கை அறிந்த ஒருவர் எங்களுக்குத் தேவை. இந்த குற்றச்சாட்டுகள் இடதுசாரி கட்சிகள் சம்பந்தப்பட்ட மத்திய அரசின் சதி” என்று அவர் கூறினார்.
தற்போது திரிணமூல் காங்கிரஸ் வெளியிட்டுள்ள வீடியோவில் பெண் மருத்துவரின் தந்தை, “இவை ஆதாரமற்ற வதந்திகள். காவல்துறை அதிகாரிகளால் லஞ்சம் கொடுக்க முயற்சித்தது பற்றி நாங்கள் எதுவும் கூறவில்லை. இது அப்பட்டமான பொய்” என்று அவர் கூறியுள்ளார்.
ஆகஸ்ட் 9 ஆம் தேதி கொல்கத்தா மருத்துவக் கல்லூரியில் இரண்டாம் ஆண்டு முதுநிலை மருத்துவ மாணவி பாலியல் வன்கொடுமை செய்யப்பட்டு கொல்லப்பட்டார். இந்த வழக்கில் சஞ்சய் ராய் என்பவர் அடுத்த நாள் கைது செய்யப்பட்டார். இந்த வழக்கை சி.பி.ஐ., விசாரித்து வருகிறது.