பந்தலூரில் மூடப்பட்ட ஆதிதிராவிடர் நலத்துறை பள்ளி - மக்கள் வருத்தம்

பந்தலூர்: பந்தலூரில் 50 ஆண்டு காலமாக இயங்கிவந்த ஆதிதிராவிடர் நலத்துறை பள்ளி மூடப்பட்டுள்ளது மக்கள், கல்வியாளர்கள் இடையே வருத்தத்தை ஏற்படுத்தியுள்ளது.

மலை மாவட்டமான நீலகிரியில் பழங்குடிகள் மற்றும் ஆதிதிராவிடர் மக்கள் அதிக எண்ணிக்கையில் வாழ்ந்து வருகின்றனர். அந்த மக்களை கல்வியில் மேம்படுத்தும் வகையில் பழங்குடியினர் மற்றும் ஆதிதிராவிடர் நலத்துறை சார்பில் மாவட்டத்தின் பல பகுதிகளிலும் சிறப்பு பள்ளிகள் தொடங்கப்பட்டன. மாணவர்களின் எண்ணிக்கை குறைவதாகச் சொல்லி நீலகிரி மாவட்டத்தில் இயங்கிவந்த அரசு பள்ளிகளை தொடர்ந்து மூடி வருகின்றனர்.

இந்நிலையில், பந்தலூர் அருகில் உள்ள கையுண்ணி பகுதியில் கடந்த 50 ஆண்டுகளுக்கு மேலாக இயங்கிவந்த ஆதிதிராவிடர் நலத்துறையின் தொடக்கப்பள்ளியை மூடியிருக்கிறது கல்வித்துறை. இதற்கு உள்ளூர் மக்கள் முதல் கல்வியியல் செயல்பாட்டாளர்கள் வரை கண்டனம் தெரிவித்து வருகின்றனர்.

இது குறித்து கல்வித்துறை அதிகாரிகளிடம் கேட்ட போது, “நூற்றுக்கணக்கான மாணவர்கள் பயின்று வந்த இந்த பள்ளியில் படிப்படியாக மாணவர்களின் எண்ணிக்கை குறைந்தது. நடப்பு கல்வியாண்டில் 2 மாணவர்கள், 2 மாணவிகள் என 4 பேர் மட்டுமே பயின்று வந்தனர். ஒரு பொறுப்பு ஆசிரியரும் பணியாற்றி வந்தார். 4 மாணவர்களும் அருகில் உள்ள பள்ளியில் சேர்க்கப்பட்டு விட்டதால் வேறுவழியின்றி பள்ளியை மூட வேண்டிய நிலை ஏற்பட்டுள்ளது’’ என்றனர்.

கல்வியாளர்கள் கூறும்போது, ‘‘அரசு பள்ளிகளில் மாணவர் எண்ணிக்கை குறைவதாக சொன்னாலும் நீலகிரி மாவட்டத்தில் அது உண்மையில்லை. உணவு, குடியிருப்பு என அடிப்படை தேவைகளுக்காக போராடும் பழங்குடிகளும் பெருந்தோட்ட தினக்கூலிகளும் தங்கள் குழந்தைகளை தனியார் பள்ளியில் சேர்க்க வாய்ப்பில்லை.

நீலகிரி மாவட்டத்தில் பழங்குடி மற்றும் ஆதிதிராவிடர் மாணவர்களின் பள்ளி இடைநிற்றல் சர்வசாதாரணமான ஒன்றாக பார்க்கப்படுகிறது.அர்ப்பணிப்புள்ள சில ஆசிரியர்கள், அதிகாரிகளை தவிர இதைப்‌பற்றி மற்ற ஆசிரியர்களோ கல்வித்துறை அதிகாரிகளோ கண்டுகொள்வதில்லை. இதனால்தான் எண்ணிக்கை குறைந்து பள்ளிகளை மூட வேண்டிய நிலை ஏற்படுகிறது. அந்த மக்கள் வாழும் பகுதிகளில் தொடர்ந்து ஆய்வு செய்து இடைநிற்றல் மாணவர்களை மீண்டும் பள்ளிகளில் சேர்க்க நடவடிக்கை எடுக்க வேண்டும்’’ என்றனர்.