இளநிலை மருத்துவ படிப்புகளுக்கான நீட் நுழைவுத் தேர்வு வெளிநாடுகளில் உள்ள 14 தேர்வு மையங்களில் நடைபெறும் என தேசிய தேர்வு முகமை அறிவித்துள்ளது.
எம்பிபிஎஸ், ஆயுர்வேதம், சித்தா, யுனானி, ஹோமியோபதி உள்ளிட்ட இளநிலை மருத்துவ படிப்புகளுக்கு நீட் நுழைவுத் தேர்வு கட்டாயமாக்கப்பட்டுள்ளது. நடப்பாண்டிற்கான நீட் நுழைவுத் தேர்வுக்கான விண்ணப்ப பதிவு ஏற்கெனவே தொடங்கியுள்ளது. நாட்டில் உள்ள 554 தேர்வு மையங்களில் மே 5ம் தேதி இந்த தேர்வு நடைபெறும் என தேசிய தேர்வு முகமை அறிவித்துள்ளது. இதனிடையே இந்த தேர்வுகளை வெளிநாடுகளைச் சேர்ந்த ஏராளமான வெளிநாடு வாழ் இந்திய மாணவர்கள் எழுதி வருகின்றனர்.
அந்த வகையில் இந்தியாவிற்கு வெளியே தேர்வு எழுதும் வகையில் மாணவர்களுக்கு எந்தெந்த மையங்கள் ஒதுக்கப்பட்டுள்ளது என்பது தொடர்பான தகவல்கள் வெளியாகாததால் சில மாணவர்கள் கவலை அடைந்தனர். இது தொடர்பாக தேசிய தேர்வு முகமைக்கு அவர்கள் வெளிநாடு தேர்வு மையங்கள் குறித்த தகவல்களை வெளியிட வேண்டும் என வலியுறுத்தி இருந்தனர். இந்த நிலையில் உலகம் முழுவதும் 12 வெளிநாடுகளில் உள்ள 14 தேர்வு மையங்களில் நீட் தேர்வு நடைபெறும் என தேசிய தேர்வு முகமையின் மூத்த இயக்குநர் சாதனா பராசரர் தெரிவித்துள்ளார்.
இது குறித்து பேசி உள்ள அவர், ”நீட் தேர்வுக்கான விண்ணப்பத்தில் இந்தியாவில் உள்ள தேர்வு மையங்களைத் தேர்வு செய்து கட்டணம் செலுத்திய மாணவர்களுக்கு தேர்வு மையங்களை மாற்ற வாய்ப்பளிக்கப்படும். விண்ணப்பம் பதிவு நிறைவடைந்த உடன் விண்ணப்பத்தில் திருத்தம் மேற்கொள்வதற்கான கால அவகாசம் வழங்கப்படும். அப்போது தங்களுக்குரிய நாடுகளையும் தேர்வு மையங்களையும் அவர்கள் தேர்வு செய்து கொள்ளலாம்” என தெரிவித்துள்ளார்.
தேசிய தேர்வு முகமை அறிவித்துள்ள பட்டியலின்படி ஐக்கிய அரபு அமீரகத்தில் துபாய், அபுதாபி, சார்ஜா ஆகிய நகரங்களிலும் குவைத் நகரம், தாய்லாந்தின் பாங்காக், இலங்கையின் கொழும்பு, கத்தாரின் தோஹா, நேபாளத்தின் காட்மண்டு ஆகிய தேர்வு மையங்கள் செயல்படும் என அறிவிக்கப்பட்டுள்ளது.
இதே போல் மலேசியாவின் கோலாலம்பூர், பஹ்ரைனின் மனாமா, ஓமனின் மஸ்கட், சவுதி அரேபியாவின் ரியாத், சிங்கப்பூர் ஆகிய 14 தேர்வு மையங்களில் நீட் தேர்வு நடைபெறும் என அறிவிக்கப்பட்டுள்ளது. இந்த தேர்வுக்கு விண்ணப்பிக்க வருகிற மார்ச் 9-ம் தேதி கடைசி தினம் என்பது குறிப்பிடத்தக்கது. இதையடுத்து மாணவர்கள் ஆர்வத்துடன் நீட் தேர்வுக்காக விண்ணப்பித்து வருகின்றனர்.