புதுச்சேரி: இரண்டாம் ஆண்டாக நடப்பாண்டும் தேசிய நல்லாசிரியர் விருது பட்டியில் புதுச்சேரிக்கு ஓர் இடம் கூட இல்லை.
மத்திய கல்வி அமைச்சகத்தின் பள்ளிக் கல்வித் துறை சார்பில் நாடு முழுவதும் பணிபுரியும் சிறந்த ஆசிரியர்களுக்கு தேசிய நல்லாசிரியர் விருது வழங்கப்படுகிறது. அதன்படி, 2024-ம் ஆண்டு தேசிய நல்லாசிரியர் விருது பெறுவோரின் பட்டியல் வெளியிடப்பட்டுள்ளது. விருது பெறும் நல்லாசிரியர்களுக்கு டெல்லியில் செம்படம்பர் 5-ம் தேதி நடைபெறும் விழாவில் ரூ.50 ஆயிரம் ரொக்கத்துடன் வெள்ளி மெடலும் சான்றிதழும் தரப்படவுள்ளது.
நாடு முழுவதும் பல்வேறு மாநிலங்களில் இருந்து 50 ஆசிரியர்கள் விருதுப்பட்டியலில் இடம்பெற்றுள்ளனர். தமிழ்நாட்டில் இருந்து 2 பேர் இடம் பெற்றுள்ளனர். புதுவை மாநிலத்தில் இருந்து இந்த ஆண்டும் தேசிய நல்லாசிரியர் விருதுக்கு ஆசிரியர்கள் விண்ணப்பித்திருந்தனர். ஆனால், விண்ணப்பித்த ஓர் ஆசிரியர் பெயர்கூட விருதுப் பட்டியலில் இல்லை.
கடந்த 2023-ம் ஆண்டும் தேசிய நல்லாசிரியர் விருதுக்கு புதுச்சேரியில் இருந்து பலர் விண்ணப்பித்தும் யாரும் தேர்வாகவில்லை. தற்போது இரண்டாம் ஆண்டாக விண்ணபித்த யாரும் தேசிய நல்லாசிரியர் விருதுக்கு தேர்வாகாதது புதுச்சேரி கல்வித்துறை வட்டாரங்களில் அதிர்வை ஏற்படுத்தியுள்ளது.
» தஞ்சையில் அண்ணாமலை உருவ பொம்மையை எரித்த அதிமுகவினரை தடுத்த 2 போலீஸார் காயம்
» அரசுப் பள்ளியில் வகுப்பறை மேற்கூரை சிமென்ட் பூச்சு விழுந்ததில் 3 மாணவர்கள் காயம் @ ஊத்தங்கரை
நடப்பு கல்வியாண்டில் சிபிஎஸ்இ பாடத்திட்டத்தை முழுமையாக அமல்படுத்தியுள்ள சூழலில் புதுச்சேரியில் ஒருவருக்குக்கூட நல்லாசிரியர் விருது கிடைக்காதது ஏமாற்றத்தை தருவதாக கல்வியாளர்கள் கவலை தெரிவிக்கின்றனர்.