சென்னை: கீழ்பாக்கம் காவல் மாவட்டத்தில் 17 வயது சிறுமிக்கு பாலியல் தொந்தரவு கொடுத்த குற்றவாளிக்கு 3 ஆண்டுகள் கடுங்காவல் சிறை தண்டனை விதித்து போக்சோ சிறப்பு நீதிமன்றம் தீர்ப்பளித்துள்ளது.
இது தொடர்பாக காவல்துறை வெளியிட்டுள்ள அறிக்கையில், "2018ம் ஆண்டு, சென்னை பெருநகர காவல், கீழ்பாக்கம் காவல் மாவட்டத்தில் வசித்து வந்த 17 வயது சிறுமிக்கு ஒரு நபர் பாலியல் தொந்தரவு கொடுத்துள்ளதாக, மேற்படி சிறுமியின் தாயார் கொடுத்த புகார் மீது அயனாவரம் அனைத்து மகளிர் காவல் நிலையத்தில் போக்சோ உள்ளிட்ட சட்டப்பிரிவுகளில் வழக்குப் பதிவு செய்து, சிறுமிக்கு பாலியல் தொந்தரவு கொடுத்த 24 வயது (2018ம் ஆண்டு) நபரை கைது செய்து, நீதிமன்றத்தில் ஆஜர்படுத்தி, நீதிமன்ற உத்தரவுப்படி சிறையில் அடைத்தனர்,
இவ்வழக்கு, காவல்துறையினரால் முறையாக விசாரிக்கப்பட்டு, இறுதி அறிக்கை தயார் செய்து, நீதிமன்றத்தில் தொடர்ச்சியாக சாட்சிகள் ஆஜர்படுத்தப்பட்டு, நீதிமன்ற வழக்கு விசாரணை முடிவடைந்து, சென்னை, அல்லிக்குளம், மகிளா நீதிமன்றத்தில் இறுதி தீர்ப்பு ஜனவரி 27ம் தேதி அன்று வழங்கப்பட்டது.
இவ்வழக்கில் கைது செய்யப்பட்ட இளைஞர் மீது குற்றம் நிரூபிக்கப்பட்டதால், 3 ஆண்டுகள் கடுங்காவல் சிறை தண்டனை மற்றும் ரூ.25,000 அபராதமும், அபராதம் செலுத்த தவறினால் மேலும் 2 மாதம் சிறை தண்டனை அனுபவிக்க வேண்டும் என மகிளா நீதிமன்ற நீதிபதி தீர்ப்பு வழங்கினார்.
» சென்னையில் குத்துச்சண்டை வீரர் வெட்டி படுகொலை: முன் விரோதத்தால் பயங்கரம்; 9 பேர் கைது!
» ரீல்ஸ் எடுப்பதாக சொல்லி சிறுவர்களுக்கு பாலியல் சீண்டல்: 4 யூடியூப் பிரபலங்கள் போக்சோவில் கைது
இதனிடையே, வழக்கில் சிறப்பாக புலனாய்வு செய்து, நீதிமன்ற நடவடிக்கைகளுக்கு சிறப்பு கவனம் செலுத்தி குற்றவாளிக்கு உரிய தண்டனை பெற்று தந்த அயனாவரம் அனைத்து மகளிர் காவல் நிலைய ஆய்வாளர் மற்றும் நீதிமன்ற அலுவல் பணிபுரியும் காவல் குழுவினரை உயரதிகாரிகள் வெகுவாகப் பாராட்டினர்” என்று காவல்துறை செய்திக்குறிப்பில் தெரிவித்துள்ளார்.