ஸ்ரீவில்லிபுத்தூரில் இளைஞர் கொலை: சாக்குமூட்டையில் கட்டி வீசிய கொடூரம்

ஶ்ரீவில்லிபுத்தூர்: ஶ்ரீவில்லிபுத்தூர் சந்தைபேட்டை தெருவை சேர்ந்த பிரகாஷ்ராஜ் என்பவரை கொலை செய்த கும்பல், அவரது உடலை சாக்கு பையால் மூடி சாலையில் போட்டு விட்டு சென்ற சம்பவம் அதிர்ச்சியை ஏற்படுத்தியுள்ளது.

ஸ்ரீவில்லிபுத்தூர் நகர் காவல் நிலையம் எதிரே உள்ள சந்தைப்பேட்டை தெருவை சேர்ந்தவர் பிரகாஷ்ராஜ்(45). இவருக்கு திருமணமாகவில்லை. வங்கியில் தற்காலிக ஊழியராக பணியாற்றிய பிரகாஷ்ராஜ், தற்போது கிடைத்த வேலைக்கு சென்று வந்தார்.

இந்நிலையில் இன்று அதிகாலை 5 மணி அளவில் சந்தைபேட்டை தெருவில் சாக்கு பையால் மூடிய நிலையில் பிரகாஷ்ராஜ் தலையில் வெட்டு காயங்களுடன் இறந்து கிடந்தார்.

இது குறித்த தகவலறிந்து சம்பவ இடத்திற்கு வந்த போலீஸார், பிரகாஷ்ராஜின் உடலை மீட்டு பிரேத பரிசோதனைக்காக விருதுநகர் அரசு மருத்துவக் கல்லூரி மருத்துவமனைக்கு கொண்டு சென்றனர். சம்பவ இடத்தில் விருதுநகர் மாவட்ட காவல் கண்காணிப்பாளர் கண்ணன் நேரில் ஆய்வு செய்து விசாரணை நடத்தினார். இக்கொலை சம்பவம் குறித்து ஶ்ரீவில்லிபுத்தூர் நகர் போலீஸார் அப்பகுதியில் உள்ள சிசிடிவி காட்சிகளை ஆய்வு செய்து வருகின்றனர். மேலும் இக்கொலை தொடர்பாக இருவரை பிடித்து விசாரித்து வருகின்றனர்.