சென்னை - எண்ணூரில் இளைஞர் கொலை: 4 பேர் கைது

பொன்னேரி: சென்னை, எண்ணூரில் இளைஞர் கொலை செய்யப்பட்டது தொடர்பாக 4 இளைஞர்கள் கைது செய்யப்பட்டனர்.

சென்னை, எண்ணூர்-அன்னை சிவகாமி நகரை சேர்ந்தவர் பாலா என்கிற யுவராஜ். இளைஞரான இவர் கடந்த ஆகஸ்ட் மாதத்தில், தன் வீட்டருகே வசிக்கும் சஞ்சய், சூர்யா, ஈஸ்வரபாண்டி, விஜய்குமார் உள்ளிட்டோரிடம் மது அருந்துவதற்காக பணம் கேட்டு மிரட்டி வந்துள்ளார். எனவே, சஞ்சய், சூர்யா, ஈஸ்வரபாண்டி, விஜயகுமார் ஆகிய 4 பேரும் யுவராஜின் வீட்டுக்கு அவர் இல்லாத நேரத்தில் அடிக்கடி சென்று தொடர்ந்து தகராறு வந்ததாக கூறப்படுகிறது.

இதுதொடர்பாக வழக்குப்பதிவு செய்த எண்ணூர் போலீஸார் சஞ்சய், சூர்யா உள்ளிட்ட 4 பேரை கைது செய்து நீதிமன்ற காவலுக்கு உட்படுத்தினர். அதன் பிறகு, யுவராஜ் மீது பல குற்றச்சாட்டுகள் தொடர்ந்து வந்ததால் அவரையும் போலீஸார் கைது செய்து நீதிமன்ற காவலுக்கு உட்படுத்தினர்.

இந்நிலையில், சிறையில் இருந்து வெளியில் வந்த யுவராஜ் ஆந்திராவில் வசித்து வந்துள்ளார். இச்சூழலில், யுவராஜ் மது போதையில் நேற்று நள்ளிரவு தனது நண்பரான தியாகராஜன் என்பவருடன் மோட்டார் சைக்கிளில், எண்ணூர் - அன்னை சிவகாமி நகர் 5-வது தெருவில் சென்று கொண்டிருந்தார்.

அப்போது, சஞ்சய் வீட்டின் முன்பு சஞ்சய், சூர்யா, ஈஸ்வரபாண்டி, விஜய்குமார் ஆகியோர் அமர்ந்து பேசிக்கொண்டிருந்ததை பார்த்த யுவராஜ்,’ நான் இல்லாத போது எனது வீட்டுக்கு வந்து ஏன்டா பிரச்சனை செய்தீங்க. இப்ப வாங்கடா. நான் வந்திருக்கேன்’ என்று சஞ்சய் உள்ளிட்ட 4 பேரை, கத்தியை காட்டி மிரட்டியுள்ளார். இதனால், கோபமடைந்த சஞ்சய், சூர்யா, ஈஸ்வரபாண்டி, விஜய்குமார் ஆகிய 4 பேர் யுவராஜை கத்தியால் பலமுறை வெட்டியதாக கூறப்படுகிறது. இதில், படுகாயமடைந்த யுவராஜ் சம்பவ இடத்திலேயே உயிரிழந்தார்.

யுவராஜை வெட்டியதை தடுத்த அவரது நண்பர் தியாகராஜனையும் சஞ்சய் உள்ளிட்ட 4 பேரும் கத்தியால் வெட்டினர். இதில், படுகாயமடைந்த தியாகராஜன், சென்னை ஸ்டான்லி அரசு மருத்துவமனையில் அனுமதிக்கப்பட்டு தீவிர சிகிச்சை பெற்று வருகிறார்.

இது குறித்து, வழக்குப் பதிவு செய்து விசாரித்த எண்ணூர் போலீஸார், கொலை சம்பவம் நடந்த இரண்டு மணி நேரத்தில், யுவராஜ் கொலை தொடர்பாக சஞ்சய், சூர்யா, ஈஸ்வரபாண்டி, விஜய்குமார் ஆகிய 4 பேரை செய்தனர்.