கரூரில் பரிதாபம்: பாசன வாய்க்காலில் மூழ்கி சிறுவன் உயிரிழப்பு

கரூர்: மாயனூரில் பாசன வாய்க்காலில் மூழ்கி சிறுவன் உயிரிழந்தார். உடலை மீட்டு மாயனூர் போலீஸார் விசாரணை நடத்தி வருகின்றனர்.

கரூர் மாவட்டம் மாயனூர் தென்கரை வாய்க்கால் கரையோரம் தண்ணீர் பாலம் அருகே வசிப்பவர் கணபதி (28), சித்ரா (26) தம்பதியினர். இவர்களது மகள் நாய்க்கடித்து உயிரிழந்த நிலையில், கிஷாந்த் என்ற ஆண் குழந்தை ஒன்றை தத்தெடுத்து வளர்த்து வந்தனர். ஒன்றரை வயதாகும் கிஷாந்துக்கு, தாய் சித்ரா இன்று (நவ.20ம் தேதி) காலை உணவு ஊட்டிவிட்டு வீட்டு வேலைகளை பார்த்துள்ளார். அரை மணி நேரத்திற்கு பிறகு வீட்டினுள் மகன் கிஷாந்தை காணாமல் தேடியுள்ளார்.

அக்கம்பக்கம் வீடுகளில் தேடியும் சிறுவன் இல்லாததால், பதற்றமடைந்தவர்கள் வாய்க்காலில் சிறுவன் தவறி விழுந்திருக்கலாம் என்பதால் மாயனூர் கதவணை நிர்வாக அலுவலகத்திற்கு தகவல் அளித்தனர். இதையடுத்து, தண்ணீர் வெளியேற்றுவது நிறுத்தப் பட்டு அப்பகுதி மீனவர்கள் மற்றும் பொதுமக்கள் உதவியுடன் வாய்க்காலில் சுமார் 1 மணி நேரம் தேடிய நிலையில் சிறுவன் கிஷாந்தை சடலமாக மீட்டனர்.

இதையடுத்து மாயனூர் போலீஸார் வழக்குப் பதிவு செய்து சிறுவன் சடலத்தை கைப்பற்றி கரூர் அரசு மருத்துவக் கல்லூரி மருத்துவமனைக்கு பிரேத பரிசோதனைக்கு அனுப்பி, வழக்குப் பதிவு செய்து விசாரணை நடத்தி வருகின்றனர்.