சென்னை: திருத்தணியில் இருந்து சென்னை சென்ட்ரல் நோக்கி கடந்த 14ம் தேதி காலை வந்த மின்சார ரயிலில் 10-க்கும் மேற்பட்ட கல்லுாரி மாணவர்கள் ரயிலில் தொங்கியபடியே பயணம் செய்தனர்.
வியாசர்பாடி ரயில் நிலையம் வந்தபோது, பயணிகளுக்கு இடையூறு ஏற்படும் விதமாக கூச்சலிட்டு அட்டகாசம் செய்தனர். நடைமேடையில் காலை உரசியபடி பயணம் செய்தனர். இதுதொடர்பான வீடியோ பரவி வைரலானது. இது குறித்து பெரம்பூர் ரயில்வே போலீஸார் வழக்குப் பதிவு செய்து, விசாரணை நடத்தினர். இதில், அவர்கள் பச்சையப்பன் கல்லுாரி மாணவர்கள் என தெரியவந்தது.
இதுதொடர்பாக, 9 பேர் மீது ரயில்வே போலீஸார் வழக்குப் பதிவு செய்துள்ளனர். அவர்களில் திருவள்ளூர் மாவட்டத்தைச் சேர்ந்தபரத் (18), திருவலங்காட்டைச் சேர்ந்த 17 வயது மாணவன் ஆகியோரை நேற்று கைது செய்தனர். 18 வயது மாணவனை சொந்த ஜாமீனிலும், 17 வயது மாணவனை எச்சரித்து பெற்றோரிடமும் ஒப்படைத்தனர். மற்ற 7 பேரை தேடி வருகின்றனர்.