விற்பனைக்கு வைத்திருந்த 550 கிலோ கலப்பட நெய் சிக்கியது: உணவு பாதுகாப்பு துறை அதிரடி

ராஜஸ்தான்: உணவு பாதுகாப்பு துறையினர் கோட்புட்லி-பெஹ்ரோர் மாவட்டத்தில் உள்ள ஒரு நிறுவனத்தில் நடத்திய சோதனையில் 550 கிலோ கலப்பட நெய்யை பறிமுதல் செய்தனர்.

ராஜஸ்தான் உணவு பாதுகாப்பு துறையினர் கோட்புட்லி-பெஹ்ரோர் மாவட்டத்தில் உள்ள ஒரு நிறுவனத்தில் நடத்திய சோதனையைத் தொடர்ந்து 550 கிலோ கலப்பட நெய்யை பறிமுதல் செய்தனர். நீண்டகால புகார்களின் பேரில், கூடுதல் மாவட்ட ஆட்சியர் ஓம்பிரகாஷ் சரண் தலைமையில் உணவு பாதுகாப்பு அதிகாரி ஹேமந்த் குமாருடன் இணைந்து சன்வர்யா அக்ரோ ஃபுட்ஸ் நிறுவனத்தில் நேற்று சோதனை நடத்தப்பட்டது. பறிமுதல் செய்யப்பட்ட நெய்யின் மாதிரிகள் சோதனைக்காக ஜெய்ப்பூருக்கு அனுப்பப்பட்டுள்ளன.

இதுகுறித்து உணவுபாதுகாப்பு அதிகாரி ஹேமந்த் குமார் கூறுகையில், ஹரியானாவைச் சேர்ந்த மஞ்சீத் என்ற உரிமையாளர், டெல்லியில் இருந்து மொத்தமாக நெய்யை கொண்டு வந்து, அதை மீண்டும் பேக்கிங் செய்து கிராமப்புறங்களில் உள்ள உள்ளூர் வியாபாரிகளுக்கு விற்பனை செய்ததாக நிறுவனத்தின் ஊழியர்கள் தெரிவித்தனர்.

இந்த சோதனையின் போது, ​​பெரிய இரும்பு டிரம்களில் நெய் சேமித்து வைக்கப்பட்டு, மறுவிநியோகத்திற்கு தயாராக இருந்ததை உணவு பாதுகாப்பு குழுவினர் கண்டுபிடித்தனர். இதில் கலப்படம் இருக்கலாம் என சந்தேகித்த குழுவினர், நெய்யின் மாதிரிகளை ஜெய்ப்பூர் உணவு பாதுகாப்பு ஆய்வகத்திற்கு அனுப்பி மீதியை கைப்பற்றினர். ஆய்வக முடிவுகளைத் தொடர்ந்து, உணவுப் பாதுகாப்புச் சட்டம் 2006ன் கீழ் கடுமையான சட்ட நடவடிக்கை எடுக்கப்படும் என்று உணவு பாதுகாப்பு துறை தெரிவித்துள்ளது.

இந்த மாத தொடக்கத்தில், ஒரு தொழிற்சாலையில் ஜெய்ப்பூர் போலீசார் நடத்திய சோதனையில் சுமார் 1,000 லிட்டர் கலப்பட நெய் கைப்பற்றப்பட்டது, இது தொடர்பாக 2 பேர் கைது செய்யப்பட்டனர்.