புதுடெல்லி: தனது சகோதரரின் 4 வயது மகளை பாலியல் வன்கொடுமை செய்து கொன்று காட்டில் வீசிய நபரை போலீஸார் கைது செய்தனர்.
நரேலா பகுதியைச் சேர்ந்த 35 வயதான தினசரி கூலித் தொழிலாளி, தனது மனைவி மற்றும் இரண்டு குழந்தைகளுடன் வாடகை வீட்டில் வசித்து வருகிறார். குடிப்பழக்கத்திற்கு அடிமையான அந்த நபர், தனது மனைவியுடன் அடிக்கடி சண்டையிடுவார்.
இந்த தகராறைத் தொடர்ந்து, அவரின் மனைவி தனது மாமனாரின் வீட்டிற்குச் சென்றுவிட்டார். அந்த வீட்டில் அவரது சகோதரரும் தனது குடும்பத்துடன் வசித்து வந்தார். செப்டம்பர் 22 அன்று, தனது சகோதரரின் வீட்டிற்குச் சென்ற அந்த நபர், தனது மனைவியை வீட்டிற்குத் திரும்ப வரும்படி கேட்டுள்ளார். இந்த வாக்குவாதத்தின் போது, அவர் தனது சகோதரரின் 4 வயது மகளை கடத்துவதாக மிரட்டியுள்ளார்.
குடிபோதையில் அவர் அவ்வாறு பேசுவதாக குடும்பத்தினர் நினைத்தனர். இருப்பினும், சிறுமி காணாமல் போனதையடுத்து அவர்கள் சந்தேகமடைந்து காவல்துறைக்கு தகவல் கொடுத்தனர்.
உடனடியாக சம்பவ இடத்திற்கு விரைந்த போலீஸ் குழு, அந்த நபரை திங்கள்கிழமை கைது செய்தனர். அவர் தனது சகோதரரின் மகளை பாலியல் வன்கொடுமை செய்து கொன்றதாக போலீஸாரிடம் தெரிவித்துள்ளார். விசாரணையில், அவர் சிறுமியின் உடலை நரேலாவில் உள்ள அவர்களின் வீட்டின் அருகே உள்ள காட்டில் வீசினார் என்பது தெரியவந்தது.
இதனையடுத்து போலீஸார் சிறுமியின் உடலை மீட்டு பிரேத பரிசோதனைக்கு அனுப்பி வைத்தனர். மேலும் இது தொடர்பாக விசாரணை நடைபெற்று வருகிறது என டெல்லி புறநகர் வடக்கு போலீஸ் துணை கமிஷனர் ரவிக்குமார் கூறினார்.