சண்டிகரில், ரிசர்வ் வங்கிக்கு ரொக்கப் பணத்தை ஏற்றிச்சென்ற லாரிகள் மோதிக்கொண்ட விபத்து பரபரப்பை ஏற்படுத்தியிருக்கிறது.
திங்கள்கிழமை (செப்டம்பர் 6) பிற்பகலில் சண்டிகர் ரயில் நிலையத்திலிருந்து, அந்நகரில் உள்ள ரிசர்வ் வங்கிக் கட்டிடத்துக்குக் கோடிக்கணக்கான ரூபாய் ரொக்கத்தை ஏற்றிக்கொண்டு 5 லாரிகள் சென்றுகொண்டிருந்தன. அப்போது ஒரு லாரியின் ஓட்டுநர் திடீரென பிரேக் போட்டதால் பின்னால் வந்த லாரி, அதன் மீது மோதியது.
இவ்விபத்தில், பாதுகாப்புப் பணியில் இருந்த 3 காவலர்கள் உட்பட 5 பேர் காயம் அடைந்தனர். 2 வண்டிகளின் ஓட்டுநர்களும் பலத்த காயம் அடைந்துள்ளனர். விபத்தில் சிக்கிய லாரிகளில் இருந்த பணப் பெட்டிகளை வேறு வாகனங்களுக்கு மாற்றுவதற்காக அந்தச் சாலையில் சிறிது நேரம் போக்குவரத்து தடை செய்யப்பட்டது. இது எதிர்பாராத விபத்தா, சதி வேலையா எனப் போலீஸார் விசாரணை நடத்திவருகிறார்கள்.