சென்னை: தனுஷ் இயக்கத்தில் உருவாகி வரும் ‘இட்லி கடை’ படம் அக்டோபர் 1-ம் தேதி வெளியாகும் என அதிகாரபூர்வமாக அறிவிக்கப்பட்டுள்ளது.
‘நிலவுக்கு என்மேல் என்னடி கோபம்’ படத்துக்குப் பிறகு தனுஷ் இயக்கி நடித்துள்ள படம் ‘இட்லி கடை’. இதன் படப்பிடிப்பு மதுரை, தேனியைச் சுற்றியுள்ள பகுதிகளில் நடைபெற்று வந்தது. டான் பிக்சர்ஸ் முதல் பிரதி அடிப்படையில் தயாரித்து வரும் இப்படம் ஏப்ரல் 10-ம் தேதி வெளியீடு என முதலில் அறிவிக்கப்பட்டது.
ஆனால், ‘குட் பேட் அக்லி’ டீசர் வெளியான பின்பு, ‘இட்லி கடை’ வெளியாக வாய்ப்பில்லை என தகவல்கள் வெளியாகின. இதனை உறுதி செய்யும் விதமாக ஏப்ரல் 10-ம் தேதி வெளியீட்டில் இருந்து பின்வாங்கியது ‘இட்லி கடை’. தனுஷ் நடிப்பில் அடுத்ததாக ‘குபேரா’ படம் தான் ஜூன் 20-ம் தேதி வெளியாகவுள்ளது. அதற்கு பிறகு தான் ‘இட்லி கடை’ வெளியாகும் எனப் பேசப்பட்டது.
இந்தப் பின்னணியில், ‘இட்லி கடை’ திரைப்படம் அக்டோபர் 1-ம் தேதி வெளியாகும் என அதிகாரபூர்வமாக அறிவித்துள்ளார் தனுஷ். இப்படத்தில் ராஜ்கிரண், அருண் விஜய், நித்யா மேனன் உள்ளிட்ட பலர் முக்கிய கதாபாத்திரத்தில் நடித்துள்ளனர். இசையமைப்பாளராக ஜி.வி.பிரகாஷ் பணிபுரிந்துள்ளார்.