புதுடெல்லி: தமிழகத்தில் நடிகர் அஜித் குமார் உள்பட 3 பேர் பத்ம பூஷண் விருதும், கிரிக்கெட் வீரர் அஸ்வின் உள்பட 10 பேர் பத்மஸ்ரீ விருதும் பெறுகின்றனர்.
பத்ம விபூஷண், பத்ம பூஷண் மற்றும் பத்மஸ்ரீ ஆகிய மூன்று பிரிவுகளில் நாட்டின் உயரிய விருதுகளில் ஒன்றான பத்ம விருதுகள்
வழங்கப்படுகின்றன. கலை, சமூகப் பணி, பொது நலன், அறிவியல் மற்றும் பொறியியல், வர்த்தகம் மற்றும் தொழில், மருத்துவம், இலக்கியம் மற்றும் கல்வி, விளையாட்டு, மக்கள் சேவை போன்ற பல்வேறு துறைகளில் இந்த விருதுகள் வழங்கப்படுகின்றன.
சிறப்பான சேவைக்காக 'பத்ம பூஷண்' விருதும், எந்தவொரு துறையிலும் சிறப்பான சேவைக்கு 'பத்மஸ்ரீ' விருதும் வழங்கப்படுகிறது. ஒவ்வொரு ஆண்டும் குடியரசு தினத்தன்று இந்த விருதுகள் அறிவிக்கப்படுகின்றன. இந்த விருதுகள் ஒவ்வொரு ஆண்டும் வழக்கமாக மார்ச் / ஏப்ரல் மாதங்களில் குடியரசுத் தலைவர் மாளிகையில் நடைபெறும் விழாவில் குடியரசுத் தலைவரால் வழங்கப்படுகின்றன.
2025-ம் ஆண்டிற்கான 139 பத்ம விருதுகளை வழங்க குடியரசுத் தலைவர் ஒப்புதல் அளித்துள்ளார். 7 பேருக்கு பத்ம விபூஷண், 19 பேருக்கு பத்ம பூஷண், 113 பேருக்கு பத்மஸ்ரீ விருதுகள் அறிவிக்கப்பட்டுள்ளன. விருது பெற்றவர்களில் 23 பேர் பெண்கள், இந்தப் பட்டியலில் வெளிநாட்டினர் / வெளிநாடுவாழ் இந்தியர் / பிஐஓ / ஓசிஐ பிரிவைச் சேர்ந்த 10 பேர் மற்றும் மரணத்திற்குப் பின் விருது பெறும் 13 பேரும் அடங்குவர்.
» ஈரோடு கிழக்கில் சீமானுக்கு எதிர்ப்பு - தேர்தல் பிரச்சாரத்தில் பெரும் பரபரப்பு!
» விழுப்புரத்தில் ஊற்று தோண்டி தண்ணீர் குடிக்கும் அரசுப் பள்ளி மாணவர்கள் - அண்ணாமலை ஆதங்கம்
தமிழகத்தில் யார் யாருக்கு விருது? - தமிழகத்தைச் சேர்ந்த நல்லி குப்புசாமி செட்டிக்கு வர்த்தகம் மற்றும் தொழில் துறை பிரிவிலும், அஜித் குமார், ஷோபனா சந்திரகுமார் ஆகியோருக்கு கலைப் பிரிவிலும் பத்மபூஷண் விருது அறிவிக்கப்பட்டுள்ளது
கலைக்கான பத்மஸ்ரீ விருது தமிழ்நாட்டைச் சேர்ந்த புரிசை கண்ணப்ப சம்பந்தம், குருவாயூர் துரை, ராதாகிருஷ்ணன் தேவசேனாபதி, வேலு ஆசான், புதுச்சேரியைச் சேர்ந்த பி.தட்சிணாமூர்த்தி ஆகியோருக்கு அறிவிக்கப்பட்டுள்ளது.
இலக்கியம், கல்வி, இதழியல் பிரிவில் லட்சுமிபதி ராமசுப்பையர், சமையல் பிரிவில் கே.தாமோதரன், அறிவியல் மற்றும் பொறியியல் பிரிவில் எம்.டி.ஸ்ரீனிவாஸ், விளையாட்டுகள் பிரிவில் ஆர்.அஸ்வின், வர்த்தகம் மற்றும் தொழில்துறை பிரிவில் ஆர்.ஜி.சந்திரமோகன், இலக்கியம் மற்றும் கல்விப் பிரிவில் சீனி விஸ்வநாதன் ஆகியோருக்கு பத்மஸ்ரீ விருது அறிவிக்கப்பட்டுள்ளது.