சன்னி லியோனி கோபம்: சத்தீஸ்கர் மாநிலத்தில், திருமணமான பெண்களுக்கு ஒவ்வொரு மாதமும் வங்கிக் கணக்கில் ஆயிரம் ரூபாய் நிதி உதவியை, அம்மாநில அரசு செலுத்தி வருகிறது. இந்த திட்டத்தில் நடிகை சன்னி லியோனி பெயரில் தொடங்கப்பட்ட வங்கிக் கணக்குக்கு மாதம் ரூ.1000 அனுப்பப்பட்டு வந்ததை அதிகாரிகள் கண்டுபிடித்தனர். மோசடி செய்தவர் மீது வழக்குப் பதிவு செய்யப்பட்டுள்ளது.
இந்நிலையில், நடிகை சன்னி லியோனி தனது சமூக வலைதளப் பக்கத்தில், “எனது பெயரையும் அடையாளத்தையும் தவறாகப் பயன்படுத்தி மோசடியில் ஈடுபட்டிருப்பது துரதிர்ஷ்டவசமானது. பெண்களுக்கு அதிகாரமளிக்கவும் அவர்கள் பயனடையவும் உருவான திட்டத்தில் இப்படியொரு மோசடி நடந்திருப்பது வருந்தத்தக்கது. இச்செயலை வன்மையாகக் கண்டிக்கிறேன். இதுபற்றி முழுமையாக விசாரிக்கும் அதிகாரிகளின் முயற்சிகளுக்கு ஆதரவளிக்கிறேன்” என்று தெரிவித்துள்ளார்.
அடுத்த நோலன் படம்: பிரபல ஹாலிவுட் இயக்குநர் கிறிஸ்டோபர் நோலனின் அடுத்த படம் பற்றிய தகவல்கள் கடந்த சில நாட்களாக வெளியாகிவந்தன. இந்நிலையில், யுனிவர்சல் பிக்சர்ஸ் இதுபற்றி அதிகாரப்பூர்வமாக அறிவித்துள்ளது. நோலனின் 13-வது படமான இதற்கு ‘தி ஒடிஸி’ என்று தலைப்பு வைத்துள்ளனர். ஹோமரின் கிரேக்க காவியமான ‘தி ஒடிஸி’யை மையமாகக் கொண்டு இந்தப் படம் உருவாகிறது. புதிய ஐமேக்ஸ் தொழில்நுட்பத்தைப் பயன்படுத்தி உருவாகும் இந்தப்படம் உலகம் முழுவதும் 2026-ம் ஆண்டு ஜூலை 17-ம் தேதி வெளியாக இருக்கிறது.
கமல் புகழஞ்சலி: பிரபல இயக்குநர் ஷியாம் பெனகல் (90) மறைவுக்கு இரங்கல் தெரிவித்துள்ள நடிகர் கமல்ஹாசன், “மனிதாபிமானமுள்ள ஒரு கதைசொல்லியை இந்தியா இழந்துவிட்டது. நான் ஒரு குருவை இழந்துவிட்டேன். தனது படங்களின் மூலம், உண்மையான இந்தியாவைத் திரைக்குக் கொண்டு வந்தவர். ஆழமான சமூகப் பிரச்சினைகளைப் படங்களில் பேசிய அவர், சாதாரண விஷயங்களையும் நேசிக்க வைத்தவர்” என்று புகழஞ்சலி செலுத்தியுள்ளார்.
» சென்னை | போலீஸ் எஸ்.ஐ. மீது தாக்குதல்: கல்லூரி பேராசிரியர் கைது
» ‘த்ரிஷ்யம் 3’ கண்டிப்பாக உருவாகும்: உறுதி செய்தார் மோகன்லால்
யஷ் சம்பளம்: ‘கே.ஜி.எஃப்’ புகழ் யஷ் அடுத்து நிதேஷ் திவாரி இயக்கும் ‘ராமாயணம்’ படத்தில் ராவணனாக நடித்து வருகிறார். இதில் ரன்பீர் கபூர் ராமராகவும் சாய் பல்லவி சீதையாகவும் நடிக்கின்றனர். ரகுல் ப்ரீத் சிங், லாரா தத்தா, சன்னி தியோல் என பலர் நடிக்கின்றனர். இரண்டு பாகங்களாக இந்தப் படம் தயாராகிறது. இந்தப் படத்தில் நடிகர் யஷின் சம்பளம், படத்தின் விநியோக பங்குடன் சேர்த்து ரூ.200 கோடி என்று செய்திகள் வெளியாகியுள்ளன.
விஜய் வாழ்த்து: அட்லீ இயக்கத்தில் விஜய் நடித்த ‘தெறி’ படத்தின் இந்தி ரீமேக்கான ‘பேபி ஜான்’ இன்று வெளியாகிறது. படக்குழுவை மென்ஷென் செய்து எக்ஸ் பக்கத்தில் வாழ்த்து தெரிவித்துள்ள நடிகர் விஜய், ‘ப்ளாக்பஸ்டர் வெற்றிக்கு வாழ்த்துகள்’ என்று குறிப்பிட்டுள்ளார்.