இயக்குநர் பாலா இயக்கத்தில் நடிகர் அருண் விஜய் நடித்திருக்கும் ‘வணங்கான்’ திரைப்படம் பொங்கலுக்கு வெளியாகிறது. இதன் இசை வெளியீட்டு விழா மற்றும் இயக்குநர் பாலா திரைக்கு வந்து 25 வருடங்கள் ஆனதைக் கொண்டாடும் வகையில் விழா நேற்று மாலை நடைபெற்றது.
இதில் சிறப்பு விருந்தினர்களாக நடிகர்கள் சூர்யா, சிவகுமார், சிவகார்த்திகேயன் உள்ளிட்டப் பலர் கலந்து கொண்டனர். நிகழ்வில் கலந்து கொண்ட சிவகார்த்திகேயன் பேசியதாவது, ”என்னுடைய ‘அமரன்’ படத்திற்கு நெகட்டிவ் கிளைமாக்ஸ் உண்டு. தீபாவளிக்கு வெளியாகும் படங்களில் நெகட்டிவ் கிளைமாக்ஸ் இருந்தால் படம் ஓடாது என்ற செண்டிமெண்ட் இங்கு உண்டு. இதனால், ‘அமரன்’ தோல்வியடைந்து விடுமோ என்ற பயம் எனக்கு இருந்தது.
அதன்பிறகு, பாலா இயக்கிய ‘பிதாமகன்’ படத்திற்கு நெகட்டிவ் கிளைமாக்ஸ் இருந்தாலும் தீபாவளிக்கு வெளியாகி வெற்றியடைந்தது நினைவுக்கு வந்து எனக்கு நம்பிக்கைக் கொடுத்தது. பொங்கலுக்கு அஜித்தின் ‘விடாமுயற்சி’, அருண் விஜயின் ‘வணங்கான்’ படங்கள் வெளியாகிறது. இரண்டு படங்களுமே ஆங்கிலத்தில் ‘வி’ என்ற எழுத்தில் தான் தொடங்குகிறது. ‘வி’ என்றால் வெற்றி. இரண்டு படங்களும் வெற்றி பெற வாழ்த்துகள்” என்றார்.