ரமண பகவான் பக்தி பாடல்; கண்ணீர் மல்க பாடிய இளையராஜா!

திருவண்ணாமலை: ரமண பகவானின் 145வது ஜெயந்தியையொட்டி சிறப்பு ஆராதனையில் இசையமைப்பாளர் இளையராஜா கலந்து கொண்டு பாடல் பாடினார்.

1879 ஆம் ஆண்டு திருச்சூழி கிராமத்தில் மார்கழி மாதம் புனர்பூசம் நட்சத்திரத்தில் பிறந்தவர் ஸ்ரீ ரமண பகவான். திருவண்ணாமலை - செங்கம் சாலையில் அமைந்துள்ளது ஸ்ரீ ரமண பகவானின் ரமணாசிரமம். ஒவ்வொரு ஆண்டும் ரமண பகவானுக்கு மார்கழி மாத புனர்பூச நட்சத்திரத்தன்று ஜெயந்தி விழா வெகு விமர்சையாக கொண்டாடப்படும். அதன்படி 145- வது ஜெயந்தி விழா இன்று ரமணர் ஆசிரமத்தில் வெகு விமர்சையாக தொடங்கி நடைபெற்றது.

முன்னதாக ரமண பகவானுக்கு தயிர் சந்தனம் பஞ்சாமிர்தம் உள்ளிட்ட பல்வேறு வாசனை திரவியங்களை கொண்டு சிறப்பு அபிஷேக ஆராதனைகள் செய்யப்பட்டு வண்ண வண்ண மலர்களை கொண்டு மலர் மாலைகள் தொடுத்து சிறப்பு அபிஷேக ஆராதனைகள் நடைபெற்றது. இதற்காக ரமணரின் பக்தர்கள் ஆயிரக்கணக்கானோர் பல்வேறு மாவட்ட மாநிலங்களில் இருந்தும் பல்வேறு வெளிநாடுகளில் இருந்தும் ரமணாசிரமத்தில் குவிந்துள்ளனர்.

இந்நிகழ்ச்சியில் இசைஞானி இளையராஜா கலந்து கொண்டு ரமண பகவான் பக்தி பாடலை கண்ணீர் மல்க பாடினார். அதைத் தொடர்ந்து இசை நிகழ்ச்சி நடைபெற்றது. பின்னர் ரமணாசிரமத்திற்கு வந்த பக்தர்களுக்கு அன்னதானம் வழங்கப்பட்டது.