சிவகார்த்திகேயன் இடத்தைப் பிடித்தாரா கவின் - ‘ப்ளெடி பெக்கர்’ நடிகை அக்‌ஷயா!

சென்னை: ரசிகர்கள் மத்தியில் கவனம் பெற்ற பல ஹிட் யூடியூப் சீரிஸ்கள் மூலம் பரிச்சியமானவர் நடிகை அக்‌ஷயா. இப்போது கவின் நடிப்பில் வெளியான ‘ப்ளெடி பெக்கர்’ படத்திலும் முக்கிய கதாபாத்திரத்தில் நடித்திருக்கிறார். அவரிடம் இந்து தமிழ் யூடியூப் சேனலுக்காக நேர்காணல் செய்திருந்தோம்.

அவர் பேசியதாவது, “’ப்ளெடி பெக்கர்’ படத்திற்காக ஆடிஷன் போய்விட்டு வந்தபிறகும் கூட நான் அந்த கதாபாத்திரத்திற்கு தேர்வாவேன் என எதிர்பார்க்கவே இல்லை. ஏனெனில், இதற்கு முன்பும் இதுபோல பல ஆடிஷன்கள் போய் நிராகரிக்கப்பட்டிருக்கிறேன். ஆனால், ‘ப்ளெடி பெக்கர்’ படத்தில் நான் தேர்வாகிவிட்டேன் என சொன்னபோது நம்பவே இல்லை. முன்பு யூடியூப் தளங்களில் பல வெப்சீரிஸ் நடித்திருந்தாலும் அந்த களமும் சினிமாவும் முற்றிலும் வேறாக இருந்தது.

’ப்ளெடி பெக்கர்’ படப்பிடிப்பு பெரும்பாலும் மாளிகைக்குள்ளேயே நடந்ததால் எல்லோரும் அந்த கேரக்டரிலேயேதான் இருப்போம். சினிமாவைப் பொருத்தவரை ஒவ்வொருவருக்கும் ஒரு தனித்துவம் இருக்கும். அதுபோலதான், சிவகார்த்திகேயன் மற்றும் கவின் இருவருக்கும் தனித்துவம் இருக்கிறது. அவர்களுக்கான ரசிகர்களும் இருப்பார்கள். அதனால், யார் இடத்தையும் யாரும் பிடிக்க முடியாது” என்றார்.