இயக்குநர் லோகேஷ் கனகராஜ், தற்போது ரஜினிகாந்த் நடிக்கும் ‘கூலி’ படத்தை இயக்கி வருகிறார். இதில் சத்யராஜ், நாகர்ஜுனா, உபேந்திரா உட்படபலர் நடிக்கின்றனர்.
இவருடைய ‘லோகேஷ் கனகராஜ் சினிமாட்டிக் யுனிவர்ஸி’ன் (எல்சியு) கைதி, விக்ரம், லியோ படங்களின் கதாபாத்திரங்களுக்கு ஏராளமான ரசிகர்கள் உள்ளனர். இதன் அடுத்தடுத்த பாகங்கள் வெளிவர உள்ளன. இந்நிலையில், அவரது சினிமாட்டிக் யுனிவர்ஸில் ராகவா லாரன்ஸும் இணைந்துள்ளார்.
சுதன் சுந்தரம், ஜெகதீஷ் பழனிச்சாமியுடன் இணைந்து லோகேஷ் கனகராஜ் தயாரிக்கும் படம், ‘பென்ஸ்’. இதை ‘ரெமோ’ இயக்குநர் பாக்யராஜ் கண்ணன் இயக்குகிறார். இந்தப் படத்தின் கதையை லோகேஷ் கனகராஜ் எழுதியுள்ளார். இதில் ராகவா லாரன்ஸ் கதாநாயகனாக நடிக்கிறார். லோகேஷின் ‘எல்சியு’ என்பதால் இந்தப் படத்துக்கு எதிர்பார்ப்பு அதிகரித்துள்ளது. இதன் அறிமுக வீடியோ சமூக வலைதளங்களில் வைரலாகி வருகிறது.