ஜெயம் ரவி, பிரியங்கா மோகன், பூமிகா, நட்டி உட்பட பலர் நடித்துள்ள படம், ‘பிரதர்’.
ராஜேஷ். எம் இயக்கியுள்ள இந்தப் படத்தை ஸ்கிரீன் சீன் மீடியா என்டர்டெயின்மென்ட் நிறுவனம் தயாரித்துள்ளது. விவேகானந்த் சந்தோஷம் ஒளிப்பதிவு செய்துள்ளார். ஹாரிஸ் ஜெயராஜ் இசையமைத்துள்ளார். நாளை வெளியாகும் இந்தப் படத்தின் பத்திரிகையாளர்கள் சந்திப்பில் ஜெயம் ரவி பேசும்போது கூறியதாவது:
ஒரு தீபாவளி படத்துக்கு என்னென்ன இருக்க வேண்டுமோ, அவை ஒன்றாகச் சேர்ந்திருக்கும் படம் ‘பிரதர்’. இதில் பூமிகா எனது சகோதரியாக நடித்திருக்கிறார். திரையில் எப்போது பார்த்தாலும் சலிப்பே வராத முகம். என் குடும்பத்தினருக்கு அவரை மிகவும் பிடிக்கும். இதில் அவர் நடிக்க ஒப்புக் கொண்டது படத்துக்குக் கூடுதல் பலம்.
ஹாரிஸ் ஜெயராஜ் என் படங்களுக்கு ஹிட் கொடுக்கும் இசையமைப்பாளர். 'எங்கேயும் காதல்', 'தாம் தூம்' படங்களில் எல்லா பாடல்களையும் ஹிட் கொடுத்தவர். இந்தப் படப் பாடல் களையும் ஹிட்டாக்கி இருக்கிறார். என் ரசிகர்கள், நான் நடனம் ஆட வில்லை என வருத்தப்பட்டார்கள். ‘ஏ’ சான்றிதழ் படங்களில் மட்டுமே நடிப்பதாகவும் கூறினார்கள். அவர்களுக்காக இந்தப் படத்தில் நடனமாடி இருக்கிறேன். யு சான்றிதழ் பெற்ற படம் இது. எதிர்காலத்தில் டான்ஸ் படத்தில் நடிக்க ஆசைப்படுகிறேன்.
இதில் நானும் நன்றாக நடித்திருக்கிறேன். இது குடும்பத்துடன் சென்று ஜாலியாக ரசிக்கக் கூடிய படம். இவ்வாறு ஜெயம் ரவி கூறினார். படக்குழுவினர் கலந்து கொண்டனர்.